வாட்ஸ்அப்பில் வரும் போலியான வங்கி பரிவர்த்தனை மெசேஜ்களுக்கு 'NO' என்று பதில் அனுப்ப வேண்டாம் என ஹைதராபாத் காவல்துறை எச்சரித்துள்ளது. நீங்கள் அனுப்பும் அந்த ஒரு பதில், உங்கள் மொபைலில் உள்ள வங்கி செயலிகளை ஹேக்கர்கள் கட்டுப்படுத்த வழிவகுக்கும் ஆபத்தான மால்வேர் ஸ்கிரிப்டை செயல்படுத்திவிடும்.
மோசடி நடக்கும் விதம் எப்படி?
வாட்ஸ்அப்பில் அறிமுகமில்லாத எண்களில் இருந்து வரும் இந்த மெசேஜ்கள், உங்கள் வங்கி கணக்கிலிருந்து பணம் எடுக்கப்பட்டதாக பீதியை கிளப்பும். அதில், 'இந்த பரிவர்த்தனை நீங்கள் செய்யவில்லை என்றால் NO என டைப் செய்யவும்' என்று குறிப்பிட்டிருக்கும். வழக்கமான லிங்க் (Link) அல்லது OTP கேட்பது போலல்லாமல், இது மிகவும் ஆபத்தானது. நீங்கள் 'NO' என்று ரிப்ளை செய்தாலே, அந்த மெசேஜில் உள்ள மால்வேர் ஸ்கிரிப்ட் உங்கள் போனை தானாகவே ஹேக்கர்களின் கட்டுப்பாட்டில் கொண்டு செல்லும்.
வங்கி பயனர்கள் கவனத்திற்கு
இந்தியாவில் டிஜிட்டல் வங்கி பரிவர்த்தனைகள் அதிகரித்துள்ள நிலையில், சைபர் குற்றவாளிகள் இத்தகைய புதிய டெக்னாலஜிகளை பயன்படுத்தி மோசடியில் ஈடுபடுகின்றனர். வங்கிகள் ஒருபோதும் வாட்ஸ்அப் வழியாக இது போன்ற பரிவர்த்தனை தகவல்களை சரிபார்ப்பதில்லை என்பதை நினைவில் கொள்ளுங்கள்.
பாதுகாப்பாக இருப்பது எப்படி?
- தெரியாத எண்களில் இருந்து வரும் இது போன்ற மெசேஜ்களை உடனே பிளாக் (Block) செய்யவும்.
- அந்த சாட் பகுதியை டெலிட் (Delete) செய்துவிடுங்கள்.
- வங்கி கணக்கு குறித்த சந்தேகங்களுக்கு அதிகாரப்பூர்வ வங்கி செயலிகள் அல்லது வாடிக்கையாளர் சேவை எண்ணை மட்டுமே தொடர்பு கொள்ளுங்கள்.
ஒருவேளை நீங்கள் தவறுதலாக பதில் அனுப்பிவிட்டாலோ அல்லது உங்கள் போன் பாதிக்கப்பட்டதாக கருதினாலோ, உடனடியாக 1930 என்ற தேசிய சைபர் கிரைம் ஹெல்ப்லைனை தொடர்பு கொள்ளுங்கள். விரைவாக தகவல் தெரிவிப்பதன் மூலம் மட்டுமே உங்கள் பணத்தை இழக்காமல் காப்பாற்ற முடியும்.