மத்திய சாலை போக்குவரத்து மற்றும் நெடுஞ்சாலை அமைச்சகம், தேசிய நெடுஞ்சாலைகளுக்கான புதிய பெர்ஃபார்மென்ஸ் ரேட்டிங் முறையை அறிமுகப்படுத்துகிறது. பாதுகாப்பு, செயல் திறன் மற்றும் டோல் கட்டண சேவை அடிப்படையில் இந்த மதிப்பீடு அமையும்.
மத்திய சாலை போக்குவரத்து மற்றும் நெடுஞ்சாலை அமைச்சகம் (MoRTH), தேசிய நெடுஞ்சாலைகளின் தரம் மற்றும் பாதுகாப்பை உறுதி செய்ய புதிய ரேட்டிங் முறையை கொண்டுவருகிறது. இனிமேல், சாலைகளின் செயல் திறன், பாதுகாப்பு மற்றும் டோல் பிளாசாக்களின் சேவை தரம் ஆகியவற்றின் அடிப்படையில் இந்த சாலைகளுக்கு கிரேடிங் வழங்கப்படும்.
முதலீட்டாளர்கள் கவனிக்க வேண்டியது என்ன?
இதுவரை கட்டுமான நிறுவனங்களின் செயல்பாடு சாலை கட்டி முடிப்பதோடு முடிந்துவிடும். ஆனால், இனி சாலைகளின் நீண்டகால பராமரிப்பு மற்றும் தரத்திற்கு அதிக முக்கியத்துவம் அளிக்கப்படும். இதனால், சாலைகளை மிகச்சிறப்பாக பராமரிக்கும் நிறுவனங்கள் நீண்ட கால அளவில் லாபம் ஈட்டும் வாய்ப்பு உள்ளது. அதே நேரத்தில், பராமரிப்பில் சொதப்பும் நிறுவனங்கள் அரசின் கடும் கண்காணிப்புக்கு உள்ளாகும்.
ஒப்பந்தங்கள் மற்றும் வணிக தாக்கம்
இந்தத் துறை பெரும்பாலும் HAM (Hybrid Annuity Model) மற்றும் BOT (Build-Operate-Transfer) ஒப்பந்தங்களின் கீழ் இயங்குகிறது. புதிய ரேட்டிங் முறையில் நல்ல ஸ்கோர் எடுக்கும் நிறுவனங்களுக்கு, வருங்கால அரசு டெண்டர்களில் முன்னுரிமை கிடைக்க வாய்ப்புள்ளது. மாறாக, குறைவான ரேட்டிங் பெறும் நிறுவனங்கள் அபராதங்களை எதிர்கொள்ள வேண்டிய சூழல் ஏற்படலாம்.
தற்போது சந்தையில் உள்ள IRB Infrastructure, Dilip Buildcon, KNR Constructions, PNC Infratech மற்றும் HG Infra Engineering போன்ற முன்னணி நிறுவனங்கள், இனி தரவு சார்ந்த (Data-backed) இந்த புதிய சூழலுக்கு தங்களை மாற்றிக்கொள்ள வேண்டிய கட்டாயத்தில் உள்ளன. சாலைகளில் விபத்து விகிதம் மற்றும் டோல் பிளாசா நெரிசல் போன்ற தரவுகள் இனி வெளிப்படையாக கண்காணிக்கப்படும் என்பது குறிப்பிடத்தக்கது.