இந்தியாவில் 2026ஆம் ஆண்டின் முதல் பாதியில் மட்டும், கணவர் கொலை மற்றும் தற்கொலைகள் என மொத்தம் 554 சோக சம்பவங்கள் பதிவாகியுள்ளதாக Ekam Nyaay Foundation வெளியிட்டுள்ள அறிக்கை அதிர்ச்சி தகவலை வெளியிட்டுள்ளது. இவற்றுக்கு கள்ளக்காதல் மற்றும் குடும்ப தகராறுகளே முக்கிய காரணங்களாக கூறப்படுகின்றன.
கள்ளக்காதல் கொலையில் முதலிடம்!
குருகிராம்-ஐ தலைமையிடமாகக் கொண்ட Ekam Nyaay Foundation நடத்திய ஆய்வில், 2026 ஜனவரி 1 முதல் ஜூலை 14 வரையிலான காலகட்டத்தில், இந்தியாவில் கணவர்கள் கொல்லப்பட்டது அல்லது தற்கொலை செய்துகொண்டது என மொத்தம் 554 வழக்குகள் பதிவாகியுள்ளன. ஊடக அறிக்கைகள் மற்றும் உள் பதிவுகள் மூலம் இந்த தகவல்களை சேகரிக்கும் இந்த அமைப்பு, உண்மையான எண்ணிக்கை இதைவிட அதிகமாக இருக்கலாம் என்றும், பல வழக்குகள் முறையாக பதிவு செய்யப்படவில்லை என்றும் தெரிவித்துள்ளது.
பதிவான கொலை வழக்குகளில், 322 சம்பவங்களில் 194 வழக்குகள் கள்ளக்காதல் தொடர்பானவை என அறிக்கை கூறுகிறது. கணவர்கள் இது போன்ற உறவுகளை எதிர்த்தாலோ அல்லது கேள்வி கேட்டாலோ இதுபோன்ற வன்முறை சம்பவங்கள் நடந்ததாக தெரிவிக்கப்பட்டுள்ளது. கள்ளக்காதலுக்கு அடுத்தபடியாக, குடும்ப தகராறுகள் 88 கொலைகளுக்கு காரணமாக இருந்துள்ளன.
தற்கொலைகளுக்கு பின்னணி என்ன?
இதே காலகட்டத்தில் பதிவான 232 தற்கொலை வழக்குகளில், 104 சம்பவங்களுக்கு நீண்டகால திருமண வாழ்க்கை சிக்கல்களே முக்கிய காரணமாக சுட்டிக்காட்டப்பட்டுள்ளது. மேலும், மாமனார்-மாமியார் கொடுமை, கடுமையான குடும்பப் பிரச்சனைகள், மற்றும் பொய் குற்றச்சாட்டுகளால் ஏற்பட்ட மன அழுத்தம் போன்றவையும் தற்கொலைகளுக்கு தூண்டுதலாக இருந்ததாக அந்த அறிக்கை மேலும் தெரிவிக்கிறது.
புள்ளிவிவர சவால்கள்
இந்த சம்பவங்கள் நாடு முழுவதும் பரவியிருந்தாலும், உத்தரப் பிரதேசம் அதிகபட்சமாக 196 கொலை மற்றும் தற்கொலை வழக்குகளுடன் முதலிடத்தில் உள்ளது. மத்தியப் பிரதேசம், ராஜஸ்தான், தெலங்கானா போன்ற மாநிலங்களிலும் கணிசமான எண்ணிக்கையிலான வழக்குகள் பதிவாகியுள்ளன.
Ekam Nyaay Foundation-ன் நிறுவனர் தீபிகா நாராயண் பரத்வாஜ், இந்தியாவில் ஆண்களுக்கு எதிரான குடும்ப வன்முறை குறித்த முழுமையான தரவுகளை சேகரிக்க தேசிய அளவிலான முறையான தரவுத்தளம் இல்லாததே முக்கிய சவாலாக இருப்பதாக கூறியுள்ளார். இதனால், தற்போதைய புள்ளிவிவரங்கள் ஊடக செய்திகளை மட்டுமே சார்ந்துள்ளன. இது, ஆவணப்படுத்தப்பட்ட 554 என்ற எண்ணிக்கையை விட பல மடங்கு அதிகமாக இருக்கலாம் என அவர் எச்சரித்துள்ளார். இந்த விஷயத்தில் அரசாங்கத்தின் முறையான கண்காணிப்பு இல்லாதது, ஆராய்ச்சியாளர்களுக்கும் கொள்கை வகுப்பாளர்களுக்கும் பெரும் தடையாக உள்ளது.