பெருந்தொற்றுக்கு பிறகு முதல் முறையாக, ரந்தம்பூர் மற்றும் ரிஷிகேஷ் போன்ற சுற்றுலா தலங்களை பின்னுக்குத் தள்ளி, டெல்லி மற்றும் மும்பை ஹோட்டல் கட்டணத்தில் முதலிடத்தைப் பிடித்துள்ளன. கார்ப்பரேட் பயணங்கள் மற்றும் பெரிய அளவிலான மாநாடுகள் அதிகரித்ததே இதற்கு முக்கிய காரணம்.
கார்ப்பரேட் பயணங்களின் தாக்கம்
இந்த மாற்றத்திற்கு முக்கிய காரணம் பிசினஸ் மீட்டிங்குகள், சர்வதேச சுற்றுலாப் பயணிகளின் வருகை மற்றும் பெரிய அளவிலான மாநாடுகள் (MICE Events) மீண்டும் அதிகரித்ததுதான். Hotelivate அறிக்கையின்படி, டெல்லியில் சராசரி அறையின் வருவாய் (RevPAR) ₹9,811 ஆகவும், மும்பையில் ₹9,761 ஆகவும் உயர்ந்துள்ளது. இது வரை முதலிடத்தில் இருந்த ரந்தம்பூர் மற்றும் ரிஷிகேஷ் தலா ₹9,649 மற்றும் ₹9,583 உடன் மூன்றாவது மற்றும் நான்காவது இடத்திற்குத் தள்ளப்பட்டுள்ளன.
சப்ளை விரிவாக்கம் மற்றும் முதலீட்டாளர்களுக்கான எச்சரிக்கை
தேவை அதிகமாக இருப்பதால், அடுத்த 5 ஆண்டுகளில் சுமார் 1.6 லட்சம் புதிய ஹோட்டல் அறைகளை உருவாக்கத் திட்டமிடப்பட்டுள்ளது. இது கடந்த ஆண்டை விட 41% அதிகம். இதன் மூலம் இந்தியாவின் பிராண்டட் ஹோட்டல் அறைகளின் எண்ணிக்கை 3.7 லட்சமாக (அதாவது 77% உயர்வு) அதிகரிக்க வாய்ப்புள்ளது. இவ்வளவு பெரிய அளவில் புதிய அறைகள் சந்தைக்கு வரும்போது, தேவை அதற்கு ஈடுகொடுக்கவில்லை என்றால், ஹோட்டல் நிறுவனங்களின் லாப வரம்பு (Profit Margin) பாதிக்கப்பட வாய்ப்புள்ளது.
வளர்ந்து வரும் இடங்கள் மற்றும் சவால்கள்
ஆன்மீக சுற்றுலா காரணமாக வாரணாசி தற்போது ₹8,857 என்ற கட்டணத்துடன் ஐந்தாவது இடத்திற்கு முன்னேறியுள்ளது. ஆனால், ஜம்மு-காஷ்மீர் பகுதிகளில் நிலைமை மாறாக உள்ளது. ஸ்ரீநகரில் பாதுகாப்பு காரணங்களால் அங்குள்ள ஹோட்டல்களின் RevPAR 51.9% சரிந்து, ₹3,323 ஆகக் குறைந்துள்ளது. ஜலந்தர், ஜம்மு மற்றும் அமிர்தசரஸ் போன்ற இடங்களிலும் இதேபோன்ற சரிவு காணப்படுகிறது. ஹோட்டல் பங்குகளில் முதலீடு செய்திருப்பவர்கள், புதிய அறைகளின் வரத்து மற்றும் ஆக்கிரமிப்பு விகிதத்தை (Occupancy Rate) தொடர்ந்து கவனிப்பது அவசியம்.