விமானத்திற்குள் ஏற்பட்ட தீ விபத்து காரணமாக, Mobikins MK-PB-04 பவர் பேங்கிற்கு DGCA அதிரடியாகத் தடை விதித்துள்ளது. இனி எந்த விமானத்திலும் இதை எடுத்துச் செல்ல முடியாது.
விமானப் பயணிகளின் பாதுகாப்பில் DGCA அதிரடி
விமானப் பயணிகளின் பாதுகாப்பைக் கருத்தில் கொண்டு, இந்திய விமானப் போக்குவரத்து இயக்குநரகம் (DGCA) செப்டம்பர் 29 அன்று ஒரு முக்கியமான உத்தரவை பிறப்பித்துள்ளது. இதன்படி, Mobikins MK-PB-04 ரக பவர் பேங்குகளை எந்தவொரு வணிக ரீதியான விமானங்களிலும் கொண்டு செல்லத் தடை விதிக்கப்பட்டுள்ளது. இந்தத் தடை, கேபின் பேக்கேஜ், செக்-இன் லக்கேஜ் மற்றும் ஏர் கார்போ என அனைத்துப் பிரிவுகளுக்கும் பொருந்தும்.
தீ விபத்து அபாயம்
விமானத்தில் பயணிகளின் பவர் பேங்குகளில் ஏற்படும் தீ விபத்துகள் (Thermal runaway events) அதிகரித்து வருவதால், இந்த நடவடிக்கை எடுக்கப்பட்டுள்ளது. இந்த குறிப்பிட்ட மாடல் பவர் பேங்க், விமானப் பயணத்திற்குப் பாதுகாப்பற்றது என்று கண்டறியப்பட்டதைத் தொடர்ந்தே, எவ்வித சமரசமும் இன்றி இந்தத் தடை உத்தரவு பிறப்பிக்கப்பட்டுள்ளது. விமானப் பாதுகாப்பு விதிகளின்படி, இத்தகைய மின்னணு சாதனங்கள் விமானத்தின் உள்ளமைப்பிற்கு அச்சுறுத்தலாக அமையலாம்.
பயணிகளின் கவனத்திற்கு
சமீபத்தில் சென்னையில் தரையிறங்க வேண்டிய IndiGo விமானம் ஒன்றில், பயணியின் பவர் பேங்க் திடீரென தீப்பிடித்ததால், அந்த விமானம் அவசரமாக ஹைதராபாத்தில் தரை இறக்கப்பட்டது. இந்தச் சம்பவத்திற்குப் பிறகு, விமான நிலையங்களில் பயணிகளின் உடைமைகளைச் சோதனையிடும் நடைமுறை தீவிரப்படுத்தப்பட்டுள்ளது. எனவே, பயணிகள் தாங்கள் பயன்படுத்தும் பவர் பேங்கின் மாடல் எண்ணைச் சரிபார்த்துவிட்டு, விமான நிலையத்திற்கு வருவது நல்லது.