விமானத்தில் ஏற்பட்ட தீ விபத்தை தொடர்ந்து, MOBIKINS MK-PB-04 ரக பவர் பேங்குகளை விமானங்களில் எடுத்துச் செல்ல DGCA அதிரடி தடை விதித்துள்ளது.
விமான பயணத்தின் போது பாதுகாப்பு நலன் கருதி, MOBIKINS MK-PB-04 என்ற குறிப்பிட்ட பவர் பேங்க் மாடலை எடுத்துச் செல்ல DGCA (Directorate General of Civil Aviation) அதிரடியாகத் தடை விதித்துள்ளது. இந்த தடை உள்நாட்டு மற்றும் சர்வதேச விமானங்கள் என அனைத்துக்கும் பொருந்தும். இனி பயணிகள் இந்த வகை பவர் பேங்குகளை ஹேண்ட் பேக்கிலோ அல்லது செக்-இன் பேக்கிலோ எடுத்துச் செல்ல முடியாது.
தீ விபத்து பின்னணி
இந்த கட்டுப்பாடு அக்டோபர் 11, 2026 அன்று நடந்த ஒரு சம்பவத்திற்கு பிறகு வந்துள்ளது. டெல்லியில் இருந்து சென்னைக்குச் சென்ற IndiGo (6E 6115) விமானத்தில், ஓவர்ஹெட் ஸ்டோரேஜ் பகுதியில் வைக்கப்பட்டிருந்த பவர் பேங்க் திடீரென தீப்பிடித்தது. இதனால் விமானம் அவசரமாக ஹைதராபாத்தில் தரையிறக்கப்பட்டது. பயணிகளுக்கு பெரிய பாதிப்புகள் இல்லையென்றாலும், விமானப் பாதுகாப்பில் இது பெரும் அச்சத்தை ஏற்படுத்தியது.
பயணிகளுக்கு எச்சரிக்கை
இந்த புதிய உத்தரவால், இனி விமான நிலைய பாதுகாப்பு மற்றும் தரைப்படை ஊழியர்கள் பயணிகளின் பேக்கேஜ்களை மிக தீவிரமாக பரிசோதிக்க உள்ளனர். லித்தியம்-அயன் பேட்டரிகள் அதிக வெப்பமடைந்து தீப்பிடிக்கும் அபாயம் (Thermal Runaway) இருப்பதால், இந்த வகை பேட்டரிகள் மீதான கெடுபிடி அதிகரித்துள்ளது.
பயணிகள் அனைவரும் தங்கள் மின்னணு சாதனங்களை கொண்டு வரும்போது, DGCA விதித்துள்ள இந்தத் தடையை கவனத்தில் கொண்டு செயல்படுமாறு அறிவுறுத்தப்படுகிறார்கள். விமானங்களின் பாதுகாப்பு விதிமுறைகளை மீறினால், அந்தப் பொருட்கள் பறிமுதல் செய்யப்படும் என்பது குறிப்பிடத்தக்கது.