இந்தியாவின் Ayush துறையில் **2014**-க்கு பிறகு இதுவரை **4,077** காப்புரிமை (Patent) விண்ணப்பங்கள் பதிவாகியுள்ளன. குறிப்பாக கொரோனா பெருந்தொற்றுக்கு பிறகு ஆராய்ச்சிகள் பலமடங்கு அதிகரித்துள்ளது, இது பாரம்பரிய மருத்துவத்தை நவீன அறிவியல் தரங்களுக்கு மாற்றும் ஒரு முக்கியமான நகர்வாக பார்க்கப்படுகிறது.
இந்தியாவின் ஆயுஷ் (Ayush) துறை தற்போது ஒரு பெரிய மாற்றத்தை சந்தித்து வருகிறது. 2014 முதல் 2026 வரையிலான நிதியாண்டுகளில், ஆண்டு காப்புரிமை விண்ணப்பங்கள் 836% அளவுக்கு அபரிமிதமான வளர்ச்சியை எட்டியுள்ளன. இதுவரை மொத்தம் 4,077 காப்புரிமை விண்ணப்பங்கள் தாக்கல் செய்யப்பட்டுள்ளன, இது பாரம்பரிய மருத்துவ முறைகளை நவீன அறிவியல் மற்றும் சட்டப்பூர்வ பாதுகாப்பு கட்டமைப்பிற்குள் கொண்டு வரும் முயற்சியாகும்.
கொரோனாவுக்கு பிந்தைய ஆராய்ச்சி வேகம்
இந்த ஆராய்ச்சி வேகம் கொரோனா பெருந்தொற்றுக்கு பிறகுதான் உச்சத்தை எட்டியது. 2014 முதல் பதிவான விண்ணப்பங்களில் சுமார் 70% விண்ணப்பங்கள் 2020 முதல் 2026 வரையிலான காலகட்டத்தில்தான் வந்துள்ளன. அதே காலக்கட்டத்தில், மொத்தம் வழங்கப்பட்ட காப்புரிமைகளில் 92.4% இந்த குறுகிய காலத்தில்தான் கிடைத்துள்ளன என்பது குறிப்பிடத்தக்கது. இதன் மூலம், அரசாங்கத்தின் ஒழுங்குமுறை நடவடிக்கைகள் மற்றும் காப்புரிமை வழங்கும் வேகம் கணிசமாக உயர்ந்துள்ளது.
கண்டுபிடிப்பில் முன்னணியில் இருப்பவர்கள் யார்?
பொதுவாக பார்மா துறையில் பெரிய நிறுவனங்கள் தான் ஆர்&டி (R&D) பணியில் ஈடுபடுவார்கள். ஆனால் ஆயுஷ் துறையில், தனிநபர் ஆராய்ச்சியாளர்கள் மற்றும் கல்வி நிறுவனங்கள் தான் முன்னணியில் உள்ளனர். தனிநபர்கள் மட்டும் 2,113 விண்ணப்பங்களையும், கல்வி மற்றும் ஆராய்ச்சி நிறுவனங்கள் 995 விண்ணப்பங்களையும் சமர்ப்பித்துள்ளன. இந்த இரண்டு பிரிவுகளும் இணைந்து மொத்த காப்புரிமைச் செயல்பாடுகளில் 76% பங்களிப்பை வழங்குகின்றன. ஸ்டார்ட்அப் நிறுவனங்களின் பங்களிப்பு தற்போது 144 விண்ணப்பங்களாக உள்ளது.
முதலீட்டாளர்கள் கவனிக்க வேண்டியது என்ன?
காப்புரிமை என்பது முதல் படி மட்டுமே. கையில் உள்ள காப்புரிமையை, க்ளினிக்கல் பரிசோதனைகள் முடிந்து, சந்தைக்கு வரும் தயாரிப்புகளாக (Commercialization) மாற்றுவதுதான் பெரும் சவால். இதற்கு அதிகப்படியான முதலீடு மற்றும் பெரிய நிறுவனங்களின் ஒத்துழைப்பு அவசியம். எனவே, எந்தெந்த காப்புரிமை பெற்ற கண்டுபிடிப்புகள் பெரிய FMCG அல்லது பார்மா நிறுவனங்களால் உரிமம் பெறப்பட்டு சந்தைக்கு வருகிறது என்பதை முதலீட்டாளர்கள் தொடர்ந்து கண்காணிப்பது அவசியம்.