குஜராத் போலீசார், செயற்கை நுண்ணறிவை (AI) பயன்படுத்தி 126 போலி வெப்சைட்களை உருவாக்கி, சுமார் 22,000 பக்தர்களிடம் ஆன்லைனில் பணம் பறித்த ஒரு மாபெரும் மோசடி கும்பலை பிடித்துள்ளனர். மத தலங்கள் மற்றும் ஹோட்டல் முன்பதிவுகளில் இந்த மோசடி நடந்துள்ளது.
AI-யை வைத்து ஆன்லைனில் மாபெரும் மோசடி!
குஜராத் சைபர் கிரைம் போலீசார், ஒரு அதிர்ச்சி தரும் மோசடி கும்பலை மடக்கியுள்ளனர். இவர்கள் செயற்கை நுண்ணறிவை (Artificial Intelligence - AI) பயன்படுத்தி, 126 போலியான வெப்சைட்களை உருவாக்கியுள்ளனர். இந்த வெப்சைட்கள் பார்ப்பதற்கு உண்மையான மத தலங்கள், ஹோட்டல்கள் மற்றும் ஆசிரமங்களின் அதிகாரப்பூர்வ தளங்களைப் போலவே இருந்துள்ளன. இதன் மூலம், ஆன்லைனில் முன்பதிவு செய்ய வந்த 22,000 பக்தர்களிடம் பல லட்சங்களை மோசடி செய்துள்ளனர்.
டெல்லி பொறியாளரே மாஸ்டர் மைண்ட்!
டெல்லியை சேர்ந்த விக்கி குப்தா என்ற பி.டெக் இன்ஜினியர் தான் இந்த மோசடிக்கு மூளையாக செயல்பட்டதாக கூறப்படுகிறது. இவருடன் ராஜஸ்தானை சேர்ந்த சைலேஷ் சைனி என்பவரும் கைது செய்யப்பட்டுள்ளார். கடந்த 8 மாதங்களாக இந்த மோசடி 11 மாநிலங்களில் அரங்கேறியுள்ளது.
எப்படி நடந்தது மோசடி?
AI கருவிகளைப் பயன்படுத்தி, இந்த மோசடி கும்பல் மிக தத்ரூபமாக போலி வெப்சைட்களின் தகவல்களையும், படங்களையும் உருவாக்கியுள்ளது. இதனால், பக்தர்கள் தாங்கள் உண்மையான தளங்களில் முன்பதிவு செய்வதாக நினைத்து, அறை முன்பதிவு, பூஜை, சிறப்பு தரிசனம் போன்றவற்றுக்கு அட்வான்ஸ் பணம் செலுத்தியுள்ளனர். ஆனால், அவர்கள் சென்ற இடத்தில் முன்பதிவு எதுவும் நடக்கவில்லை. இதனால், பலர் ஏமாற்றமடைந்தனர்.
பிரபல தலங்களும் சிக்கின!
இந்த மோசடி, குஜராத்தில் உள்ள சோமநாத், துவாரகா, அம்பாஜி போன்ற புனித தலங்கள் மட்டுமின்றி, திருப்பதி, ஷிர்டி, ஹரித்வார் போன்ற முக்கிய ஆன்மீக தலங்களையும் குறிவைத்துள்ளது.
AI-யின் விஸ்வரூபம்
தற்போது, AI தொழில்நுட்பம் எளிதாக கிடைப்பதால், குற்றவாளிகள் இதை பயன்படுத்தி குறைந்த செலவில், மிக வேகமாக போலியான தளங்களை உருவாக்கி மோசடியில் ஈடுபடுவது அதிகரித்துள்ளது. இதனால், ஆன்லைன் பணப் பரிவர்த்தனைகளில் தனிநபர்களுக்கும், நிறுவனங்களுக்கும் பெரும் ஆபத்து ஏற்பட்டுள்ளது. இந்த மோசடியில் ஈடுபட்ட மேலும் சிலரை பிடிக்க போலீசார் தீவிர விசாரணை நடத்தி வருகின்றனர்.