ஆகஸ்ட் 3, 2026 முதல் SEBI அறிமுகப்படுத்தியுள்ள புதிய Closing Auction Session முறை, F&O பங்குகளில் விலையை நிர்ணயிக்கும் முறையை மாற்றியுள்ளது. இது நீண்ட காலத்தில் முதலீட்டாளர்களுக்கு பலனளித்தாலும், ஆரம்பகட்ட ஏற்ற இறக்கங்களை கவனத்தில் கொள்வது அவசியம்.
பங்குச்சந்தை வர்த்தகம் முடிவடையும் முறையில் ஒரு பெரிய மாற்றத்தை கொண்டு வந்துள்ளது SEBI. இதுவரை பின்பற்றப்பட்ட Volume-Weighted Average Price (VWAP) முறைக்கு பதிலாக, இனி 3:15 PM முதல் 3:35 PM வரையிலான 20 நிமிட கால அவகாசத்தில் சந்தையின் உண்மையான தேவையை அடிப்படையாகக் கொண்டு விலை நிர்ணயிக்கப்படும்.
Passive முதலீட்டாளர்களுக்கு ஏன் இது முக்கியம்?
ETF மற்றும் இண்டெக்ஸ் ஃபண்டுகள் தங்கள் பெஞ்ச்மார்க் குறியீடுகளை அப்படியே பின்பற்றுபவை. குறியீட்டின் இறுதி விலை சரியாக இருந்தால் மட்டுமே, இந்த ஃபண்டுகளின் 'Tracking Error' குறையும். இந்த புதிய முறை, பெரிய ஆர்டர்களை துல்லியமாக எக்ஸிகியூட் செய்ய உதவும்.
DSP Mutual Fund-ன் அனில் கெலானியின் கணிப்புப்படி, அடுத்த 5 ஆண்டுகளில் இந்திய மியூச்சுவல் ஃபண்ட் துறையில் பாசிவ் முதலீடுகள் தற்போதைய 17-18% என்ற அளவில் இருந்து 30% ஆக உயர வாய்ப்புள்ளது. குறைந்த கட்டணத்தில் கிடைக்கும் இந்த இண்டெக்ஸ் தயாரிப்புகளை நோக்கி முதலீட்டாளர்கள் அதிக ஆர்வம் காட்டி வருகின்றனர்.
முதலீட்டாளர்கள் கவனிக்க வேண்டிய சவால்கள்
இந்த மாற்றம் உலகளாவிய தரத்திற்கு இணையாக இருந்தாலும், தற்போதைக்கு சில நடைமுறை சிக்கல்கள் உள்ளன. பல ETF-களில் F&O பங்குகள் மற்றும் சாதாரண பங்குகள் கலந்து இருக்கும். புதிய மற்றும் பழைய விலை நிர்ணய முறைகள் ஒரே நேரத்தில் செயல்படுவது, விலை வேறுபாட்டிற்கு (Pricing Mismatch) வழிவகுக்கலாம்.
மேலும், இந்த 20 நிமிட காலக்கட்டத்தில் சந்தையில் கூடுதல் வாலட்டிலிட்டி (Volatility) மற்றும் பணப்புழக்க சிக்கல்கள் இருக்க வாய்ப்புள்ளது. புதிய நடைமுறைக்கு ஏற்ப முதலீட்டாளர்களும், ஃபண்ட் மேனேஜர்களும் பழகிக்கொள்ளும் வரை, சந்தை சற்று கவனத்துடன் செயல்படுவது நல்லது.