இந்தியாவில் மியூச்சுவல் ஃபண்ட் முதலீடுகளில் SIP-ன் பங்கு **35%** ஆக உயர்ந்துள்ளது. முக்கியமாக **30** வயதிற்குட்பட்ட இளைஞர்கள் **38%** பங்களிப்பை வழங்குகின்றனர். டிஜிட்டல் பேமெண்ட் பயனர்களை எப்படி நீண்டகால பங்குச்சந்தை முதலீட்டாளர்களாக மாற்றுவது என்பதில் நிதி நிறுவனங்கள் தீவிரம் காட்டுகின்றன.
இந்திய பங்குச்சந்தையில் சில்லறை முதலீட்டாளர்களின் முதன்மை தேர்வாக SIP (Systematic Investment Plan) மாறியுள்ளது. EY அறிக்கையின்படி, 2019 நிதியாண்டில் 19% ஆக இருந்த SIP முதலீடுகள், தற்போது மொத்த மியூச்சுவல் ஃபண்ட் சொத்துக்களில் 35% ஆக அதிகரித்துள்ளது. குறிப்பாக, இந்தியாவின் டாப் 110 நகரங்களுக்கு வெளியிலிருந்தும் 12% முதலீடுகள் வருவது ஆரோக்கியமான மாற்றமாகக் கருதப்படுகிறது.
இளைஞர்களின் எழுச்சி
இந்திய முதலீட்டாளர்களின் வயது வரம்பில் பெரிய மாற்றம் ஏற்பட்டுள்ளது. கடந்த 6 ஆண்டுகளில் 23% ஆக இருந்த 30 வயதிற்குட்பட்ட முதலீட்டாளர்களின் எண்ணிக்கை, இப்போது 38% ஆக உயர்ந்துள்ளது. அதேபோல், டாப் 30 நகரங்களுக்கு வெளியே பெண் முதலீட்டாளர்களின் பங்கேற்பு 25% ஆக அதிகரித்துள்ளது. இந்த புள்ளிவிவரங்கள் முதலீடு என்பது வெறும் நகரங்களுக்கு மட்டும் உரியது என்ற பிம்பத்தை உடைத்துள்ளது.
டிஜிட்டல் இடைவெளி - சவால் என்ன?
இந்தியாவில் UPI மூலம் 55 கோடிக்கும் அதிகமானோர் பணப் பரிவர்த்தனை செய்கின்றனர். ஆனால், பங்குச்சந்தையில் செயலில் உள்ளவர்கள் வெறும் 5 கோடி மட்டுமே. தொழில்நுட்பம் இருந்தும், பயனர் நம்பிக்கை மற்றும் சரியான நிதி ஆலோசனை இல்லாததே இந்த இடைவெளிக்கு முக்கிய காரணம். இதனை சரிசெய்ய 'Wealth Stack' எனும் புதிய கட்டமைப்பு முன்மொழியப்பட்டுள்ளது. இதன் மூலம் AI மற்றும் மனித ஆலோசனைகளை ஒருங்கிணைத்து, போனஸ் அல்லது ஃபிக்சட் டெபாசிட் முதிர்வு போன்ற நேரங்களில் முதலீட்டாளர்களை ஈர்க்க திட்டமிட்டுள்ளனர்.
2035 இலக்கு: $3 டிரில்லியன்
2035-க்குள் மியூச்சுவல் ஃபண்ட் சொத்து மதிப்பு $3 டிரில்லியனைத் தாண்டும் என கணிக்கப்பட்டுள்ளது. புதிய அக்கவுண்ட்களைத் திறப்பது மட்டும் போதாது; சந்தையின் ஏற்ற இறக்கங்களை எதிர்கொண்டு முதலீட்டை எப்படித் தக்கவைக்கிறார்கள் என்பதில்தான் முதலீட்டாளர்களின் உண்மையான வெற்றி அடங்கியுள்ளது.