டிஷ் மற்றும் செட்-டாப் பாக்ஸ் (Set-top box) இல்லாமல், வெறும் இணைய வசதி மூலம் 500-க்கும் மேற்பட்ட சேனல்களை பார்க்கும் புதிய வசதியை Tata Play அறிமுகப்படுத்தியுள்ளது.
ஹார்டுவேர் இல்லா டிவி யுகம்
பாரம்பரியமான டிஷ் மற்றும் செட்-டாப் பாக்ஸ் கட்டமைப்புக்கு மாற்றாக, இணையம் வழியே நேரடியாக டிவியை பார்க்கும் வசதியை Tata Play கொண்டு வந்துள்ளது. இந்த புதிய ஆப் மூலம் ஸ்மார்ட் டிவிகளில் 500-க்கும் மேற்பட்ட சேனல்களைத் தடையின்றி ரசிக்க முடியும். இதற்கான கட்டணம் மாதம் ₹199 என நிர்ணயிக்கப்பட்டுள்ளது. கூடுதல் மொழிகளைச் சேர்க்க விரும்பினால், கூடுதலாக ₹99 செலுத்தினால் போதுமானது.
ஏன் இந்த மாற்றம்?
இந்தியாவில் DTH சேவைகளின் பயன்பாடு தொடர்ந்து குறைந்து வருகிறது. TRAI அறிக்கையின்படி, கடந்த ஆண்டில் மட்டும் ஆக்டிவ் சப்ஸ்க்ரைபர்களின் எண்ணிக்கை 13.4% சரிந்து, 4.85 கோடி என்ற நிலைக்கு வந்துள்ளது. மக்கள் தற்போது OTT மற்றும் இன்டர்நெட் சார்ந்த ஸ்ட்ரீமிங் தளங்களுக்கு மாறுவதால், இந்த நிறுவனம் தனது பிசினஸ் மாடலை முழுவதுமாக டிஜிட்டல் மயமாக மாற்ற வேண்டிய கட்டாயத்திற்குத் தள்ளப்பட்டுள்ளது.
நிறுவனத்தின் திட்டம் என்ன?
இந்தியாவில் இன்னும் சுமார் 10 கோடி வீடுகளில் டிவி வசதி இல்லை என மதிப்பிடப்பட்டுள்ளது. இவர்களுக்கு பிசிக்கல் இன்ஃப்ராஸ்ட்ரக்சர் (Physical Infrastructure) அமைப்பது கடினமான காரியம் என்பதால், இந்த ஆப் மூலம் அந்த சந்தையை பிடிக்க நிறுவனம் திட்டமிட்டுள்ளது. ஏற்கனவே உள்ள சாட்டிலைட் சேவையை இது பாதிக்காது என்றும், அதற்கு இது ஒரு துணையாகவே இருக்கும் என்றும் நிறுவனம் விளக்கம் அளித்துள்ளது.
சேனல் எண்கள் மற்றும் எலக்ட்ரானிக் ப்ரோக்ராம் கைடு (EPG) போன்ற பரிச்சயமான அம்சங்களை ஆப்பில் வழங்குவதன் மூலம், பயனர்களைத் தக்கவைக்க Tata Play முயற்சி செய்கிறது. சந்தையில் வளர்ந்து வரும் இலவச மற்றும் மலிவான ஸ்ட்ரீமிங் தளங்களுக்கு மத்தியில், இந்த புதிய முயற்சி வாடிக்கையாளர்களை எந்த அளவுக்குக் கவரும் என்பதைப் பொறுத்திருந்துதான் பார்க்க வேண்டும்.