2027 முதல் Emmy Awards நிகழ்ச்சியை உலகளவில் ஒளிபரப்பும் உரிமையை Amazon Prime Video பெற்றுள்ளது. 6 ஆண்டு கால இந்த ஒப்பந்தம் மூலம், சந்தா இல்லாமலேயே எவரும் இந்த நிகழ்ச்சியை இலவசமாகப் பார்க்கலாம்.
தொலைக்காட்சி வரலாற்றில் ஒரு மிகப்பெரிய மாற்றமாக, வரும் 2027-ம் ஆண்டு முதல் Emmy Awards நிகழ்ச்சியின் பிரத்யேக ஒளிபரப்பு உரிமையை Amazon கைப்பற்றியுள்ளது. கடந்த 70 ஆண்டுகளாக ABC, CBS, NBC மற்றும் Fox போன்ற முக்கிய நெட்வொர்க்குகள் சுழற்சி முறையில் வழங்கி வந்த இந்த நிகழ்ச்சியை, இனி Amazon நிறுவனம் தொடர்ந்து 6 ஆண்டுகளுக்கு ஒளிபரப்ப உள்ளது.
இலவசமாக பார்க்க வழி
பொதுவாக இது போன்ற பெரிய நிகழ்ச்சிகள் சந்தா செலுத்தியவர்களுக்கு மட்டுமே கிடைக்கும். ஆனால், Amazon இந்த நிகழ்ச்சியை சந்தா இல்லாமலேயே இலவசமாக ஒளிபரப்ப முடிவு செய்துள்ளது. இதன் மூலம் உலகம் முழுவதும் 240-க்கும் மேற்பட்ட நாடுகளில் தனது பயனர் தளத்தை விரிவுபடுத்தவும், விளம்பர வருவாயை (Ad Revenue) பெருக்கவும் நிறுவனம் திட்டமிட்டுள்ளது.
ஏன் இந்த மாற்றம்?
பாரம்பரிய தொலைக்காட்சிகளின் ரேட்டிங் தொடர்ந்து சரிந்து வருவதே இந்த மாற்றத்திற்கு முக்கிய காரணம். சமீபத்திய Emmy Awards நிகழ்ச்சியின் பார்வையாளர்கள் எண்ணிக்கை 10% குறைந்து, 6.7 மில்லியன் என்ற அளவிலேயே இருந்தது. இளைஞர்கள் டிஜிட்டல் தளங்களை விரும்புவதால், நிறுவனங்கள் டிஜிட்டல் ஸ்டிரீமிங் பக்கம் நகர்கின்றன.
முதலீட்டாளர்கள் கவனிக்க வேண்டியவை
இங்கு ஒரு சிறிய சிக்கலும் உள்ளது. Amazon-ன் துணை நிறுவனமான Amazon MGM Studios, Emmy விருதுக்கு போட்டியிடும் பல நிகழ்ச்சிகளைத் தயாரிக்கிறது. ஒரே நிறுவனம் விருது வழங்கும் தளத்தையும், விருது பெறும் நிகழ்ச்சிகளையும் வைத்திருப்பது 'Conflict of Interest' என்ற விமர்சனத்தை எழுப்பியுள்ளது. வரும் காலங்களில் Amazon இந்த நிகழ்ச்சியை விளம்பரங்கள் மூலம் எவ்வாறு லாபகரமாக மாற்றப்போகிறது என்பதை பொறுத்திருந்துதான் பார்க்க வேண்டும்.