Tata Education and Development Trust (TEDT) நிதியை சட்ட வழக்குகளுக்குப் பயன்படுத்தக் கூடாது என்று மெஹ்லி மிஸ்திரி எதிர்ப்பு தெரிவித்துள்ளார். Tata Trusts மற்றும் Tata Sons இடையேயான மோதல் மற்றும் தலைமைப் பொறுப்பு தொடர்பான குழப்பங்கள் முதலீட்டாளர்கள் மத்தியில் அதிர்ச்சியை ஏற்படுத்தியுள்ளது.
நிதியை ஏன் பயன்படுத்தக்கூடாது?
Tata Education and Development Trust (TEDT)-ன் ட்ரஸ்டியான மெஹ்லி மிஸ்திரி, குழுமத்தின் சட்டப் போராட்டங்களுக்காக ட்ரஸ்ட் நிதியைச் செலவிடுவதை எதிர்த்துள்ளார். Tata Trusts தலைவர் நோவல் டாடாவுக்கு அனுப்பியுள்ள கடிதத்தில், 'TEDT-யிடம் Tata Sons-ன் பங்குகள் இல்லாத நிலையில், அதன் சட்டப் போராட்டங்களுக்கான செலவை ஏற்கும் பொறுப்பு ட்ரஸ்டிற்கு இல்லை' என்று திட்டவட்டமாகத் தெரிவித்துள்ளார்.
நீடிக்கும் உட்பூசல்
டாடா குழுமத்தின் தலைவர் என். சந்திரசேகரனின் பதவிக்கால நீட்டிப்பு மற்றும் Tata Sons-ன் IPO (பங்குச் சந்தை அறிமுகம்) தொடர்பான கருத்து வேறுபாடுகள் இந்த மோதலுக்கு முக்கியக் காரணங்களாகும். ரிசர்வ் வங்கியின் விதிமுறைகளுக்கு ஏற்ப IPO-வை கொண்டு வர Tata Sons நிர்வாகம் முயன்று வரும் நிலையில், நோவல் டாடா இதற்கு எதிர்ப்பு தெரிவித்து வருவது குறிப்பிடத்தக்கது.
கடந்த காலப் பாடங்கள்
ஏற்கனவே சைரஸ் மிஸ்திரி விவகாரத்தின் போது, Tata Sons மற்றும் ட்ரஸ்டுகள் சுமார் ₹200 கோடி சட்டச் செலவுகளைச் சந்தித்தன. மிஸ்திரி தரப்பு மட்டும் சுமார் ₹50 கோடி செலவு செய்தது. மீண்டும் ஒரு சட்டப் போராட்டம் குழுமத்தின் பணத்தைச் செலவு செய்யுமோ என்ற அச்சம் முதலீட்டாளர்கள் மத்தியில் எழுந்துள்ளது.
முதலீட்டாளர்களுக்கு என்ன பாதிப்பு?
TCS மற்றும் Tata Motors போன்ற கம்பெனிகள் தனிப்பட்ட நிர்வாகத்தைக் கொண்டிருந்தாலும், பிரமோட்டர் ட்ரஸ்ட் மட்டத்திலுள்ள இத்தகைய கருத்து வேறுபாடுகள் குழுமத்தின் நீண்டகால திட்டமிடலில் நிச்சயமற்ற தன்மையை உருவாக்குகின்றன. Tata Sons-ன் IPO வருமா அல்லது நிர்வாகக் குழப்பங்களால் தள்ளிப்போகுமா என்பதுதான் தற்போது மார்க்கெட் கவனிக்கும் மிக முக்கியமான விஷயமாகும்.