இந்திய தேர்தல் ஆணையத்தின் (ECI) செயல்பாடுகளில் வெளிப்படைத்தன்மையை உறுதிப்படுத்த, சுப்ரீம் கோர்ட்டில் பொதுநல வழக்கு (PIL) தொடரப்பட்டுள்ளது. நிர்வாக ரீதியிலான கருத்து வேறுபாடுகள் மற்றும் வாக்காளர் பட்டியலில் உள்ள குளறுபடிகள் காரணமாக இந்த கோரிக்கை எழுந்துள்ளது.
தேர்தல் ஆணையத்தின் நிர்வாக செயல்பாடுகள் மற்றும் அதன் நம்பகத்தன்மையை ஆய்வு செய்ய ஒரு சுயாதீன நிபுணர் குழுவை அமைக்க வேண்டும் என்று வழக்கறிஞர் விஷால் திவாரி சுப்ரீம் கோர்ட்டில் மனு தாக்கல் செய்துள்ளார்.
சர்ச்சைக்குரிய காரணங்கள்
தலைமைத் தேர்தல் ஆணையர் கியான்ேஷ் குமார் எடுக்கும் முடிவுகளுக்கு, தேர்தல் ஆணையர்கள் சுக்்பீர் சிங் சாந்து மற்றும் விவேக் ஜோஷி ஆகியோர் எதிர்ப்பு தெரிவித்ததாக வெளியான தகவல்கள் இந்த மனுவில் சுட்டிக்காட்டப்பட்டுள்ளன. குறிப்பாக, படிவம் 6-ல் (Form 6) செய்யப்பட்ட மாற்றங்கள் மற்றும் வாக்காளர் தரவுத்தளத்தை மையப்படுத்துதல் தொடர்பான முடிவுகளில் வெளிப்படைத்தன்மை இல்லை என்று மனுதாரர் வாதிடுகிறார்.
தரவு மேலாண்மையில் குளறுபடிகள்
மனுவில் குறிப்பிடப்பட்டுள்ள சில அதிர்ச்சிகரமான புள்ளிவிவரங்கள்:
- மேற்கு வங்கம்: வாக்காளர் பட்டியலில் இருந்து நீக்கப்பட்டவர்களின் 38 லட்சம் மேல்முறையீட்டு மனுக்கள் இன்னும் தீர்க்கப்படாமல் நிலுவையில் உள்ளன.
- மகாராஷ்டிரா: வாக்காளர் பட்டியலில் 2.7 லட்சத்திற்கும் அதிகமானோர், 101 முதல் 150 வயதுடையவர்களாகத் தவறாகப் பதிவு செய்யப்பட்டுள்ளனர்.
இந்தத் தரவுச் சிக்கல்களைச் சரிசெய்ய, சைபர் பாதுகாப்பு மற்றும் அரசியலமைப்புச் சட்ட வல்லுநர்கள் அடங்கிய தணிக்கைக் குழு தேவை என மனுதாரர் வலியுறுத்தியுள்ளார். இது தவிர, தேர்தல் பிரச்சாரங்களின் போது வெறுப்புணர்வையும், மத ரீதியிலான கருத்துக்களையும் பரப்புவதைத் தடுக்க கடுமையான நீதிமன்ற உத்தரவுகளையும் இந்த மனு கோருகிறது.
கடந்த கால தேர்தல் முடிவுகளை சவால் செய்யாமல், தேர்தல் அமைப்பின் நிர்வாக அடித்தளத்தை வலுப்படுத்துவதே இந்த வழக்கின் நோக்கம் என்று மனுதாரர் தரப்பில் விளக்கம் அளிக்கப்பட்டுள்ளது. இந்த வழக்கு வரும் நாட்களில் தேர்தல் ஆணையத்தின் செயல்பாடுகளில் எத்தகைய தாக்கத்தை ஏற்படுத்தும் என்பது எதிர்பார்ப்பை ஏற்படுத்தியுள்ளது.