சொத்துரிமை வழக்கில் Madras High Court முக்கியமான தீர்ப்பை வழங்கியுள்ளது. பல ஆண்டுகளாக சொத்தை கவனிக்காமல் இருப்பவர்கள், 'Ouster' சட்டத்தின் கீழ் தங்கள் உரிமையை இழக்க நேரிடும் என நீதிமன்றம் எச்சரித்துள்ளது.
Madras High Court சமீபத்தில் வழங்கிய M. Pandiarajan vs. Tmt. Andal and Another வழக்கின் தீர்ப்பு, குடும்ப சொத்து பிரிவினையில் ஒரு முக்கிய திருப்புமுனையாக பார்க்கப்படுகிறது. பல தசாப்தங்களாக சொத்தை கவனிக்காமல், அதில் எந்தப் பங்கும் பெறாத சகோதரிகளின் உரிமையை நீதிமன்றம் ரத்து செய்துள்ளது. இந்த நடவடிக்கை 'Ouster' எனப்படும் சட்டக் கோட்பாட்டின் கீழ் வந்துள்ளது.
Ouster என்றால் என்ன?
ஒரு சொத்தில் பல வாரிசுகள் இருந்தாலும், அந்த உரிமை நிரந்தரமானது அல்ல. ஒரு வாரிசு சொத்தை முழுமையாகக் கட்டுப்படுத்தி, மற்றவர்கள் நீண்ட காலம் உரிமையை கோராமல் இருந்தால், சொத்தை வைத்திருப்பவர் அதற்கு முழு உரிமையாளராக மாற வாய்ப்புள்ளது. இந்த வழக்கில், கிட்டத்தட்ட 40 ஆண்டுகள் சகோதரர் மட்டுமே சொத்தை நிர்வகித்து வந்துள்ளார். சகோதரிகள் தங்கள் பங்கை கேட்காதது, அவர் அந்தச் சொத்தை முழுமையாகக் கைப்பற்ற வழிவகுத்துவிட்டது.
உயில் (Will) தொடர்பான எச்சரிக்கை
இந்த வழக்கில் 2005-ஆம் ஆண்டின் உயில் செல்லாது என நீதிமன்றம் அறிவித்துள்ளது. உயிலில் கையெழுத்திட்டதை சாட்சிகள் சரியாக உறுதிப்படுத்தாததே இதற்கு காரணம். சட்ட நடைமுறைகளில் ஒரு சிறிய தவறு கூட முழு உயிலையும் செல்லாததாக்கிவிடும் என்பதை இது உணர்த்துகிறது. மேலும், வழக்கின் போது சம்பந்தப்பட்ட அனைத்து வாரிசுதாரர்களையும் (Beneficiaries) இணைக்க தவறியது வழக்கை பலவீனமாக்கியது.
சொத்து பாதுகாப்புக்கு என்ன செய்ய வேண்டும்?
- நேரடித் தொடர்பு: சொத்து வருமானம் மற்றும் பராமரிப்பு குறித்து வாரிசுகள் அவ்வப்போது பேசி தெளிவுபடுத்த வேண்டும்.
- சட்ட ஆவணம்: உயில் எழுதும் போது சாட்சிகள் கையெழுத்திடுவதை உறுதி செய்வது அவசியம்.
- சரியான மேலாண்மை: உரிமையாளர்கள் சொத்தை நேரடியாகக் கவனிப்பது, சட்ட சிக்கல்களில் இருந்து பாதுகாக்கும்.