வருமான வரி தாக்கல் செய்யும் போது ஏற்படும் சிறு தவறுகளுக்காக, உங்களுக்கு கிடைக்க வேண்டிய ரீஃபண்ட் வட்டியை (Refund Interest) வருமான வரித்துறை மறுக்க முடியாது என ITAT தீர்ப்பளித்துள்ளது.
மும்பை வருமான வரி மேல்முறையீட்டு தீர்ப்பாயம் (ITAT) வழங்கியுள்ள இந்தத் தீர்ப்பு, வரி செலுத்துவோர் மற்றும் பிசினஸ் செய்பவர்களுக்கு ஒரு பெரிய பாதுகாப்பாக அமைந்துள்ளது. வருமான வரி ரிட்டர்ன் (ITR) தாக்கல் செய்யும் போது தெரியாமல் செய்யப்படும் தவறுகளைக் காரணம் காட்டி, ரீஃபண்ட் தொகையை வழங்க தாமதம் செய்வது அல்லது வட்டி தர மறுப்பது சட்டப்படி தவறு எனத் தீர்ப்பாயம் தெளிவுபடுத்தியுள்ளது.
பிரச்சனையின் பின்னணி (Section 244A)
வருமான வரிச் சட்டம் பிரிவு 244A-ன் படி, அரசு ரீஃபண்ட் கொடுக்க தாமதம் செய்தால், அந்த காலத்திற்கு வட்டி வழங்க வேண்டும். ஆனால், சில நேரங்களில் ரிட்டர்ன் தாக்கல் செய்யும் போது செய்யப்படும் சிறிய தவறுகளைச் சுட்டிக்காட்டி, 'தாமதத்திற்கு வரி செலுத்துபவரே காரணம்' என அதிகாரிகள் வட்டி தருவதைத் தவிர்த்து வந்தனர். இதை ITAT தற்போது திட்டவட்டமாக நிராகரித்துள்ளது.
வட்டி எப்போது கிடைக்கும்?
வரி செலுத்துபவர் வேண்டுமென்றே அதிகாரிகளுடன் ஒத்துழைக்காமல் இருந்தாலோ, தகவல்களை மறைத்தாலோ மட்டுமே வட்டி மறுக்கப்பட முடியும். மற்றபடி, சாதாரண தவறுகள் அல்லது நிர்வாக ரீதியான தாமதங்களுக்கு வட்டி வழங்கியே தீர வேண்டும்.
கூடுதல் வட்டி பலன்
சட்டம் பிரிவு 244A(1A)-ன் படி, மேல்முறையீட்டு உத்தரவுகளுக்குப் பிறகும் ரீஃபண்ட் வழங்கப்படாமல் இருந்தால், வழக்கமான வட்டியுடன் சேர்த்து ஆண்டுக்கு கூடுதலாக 3% வட்டி வழங்கப்பட வேண்டும் என்று தீர்ப்பாயம் கூறியுள்ளது. ஒரு வழக்கில், கிட்டத்தட்ட 2 ஆண்டுகள் தாமதமான ரீஃபண்டிற்கு இந்த வட்டி வழங்க உத்தரவிடப்பட்டுள்ளது.
வரி செலுத்துவோர் தங்களது அனைத்து வரி தொடர்பான ஆவணங்களையும், நோட்டீஸ்களையும் சரியாகப் பராமரிப்பது அவசியம். ரீஃபண்ட் கிடைக்க அதிக தாமதம் ஏற்பட்டால், இந்தச் சட்டப் பிரிவுகளைப் பயன்படுத்தி உங்களது உரிமையை நிலைநாட்ட முடியும் என்பதை நினைவில் கொள்ளுங்கள்.