வருமான வரித் துறையின் கெடுபிடிகளுக்கு மத்தியில், விவசாயிகளுக்கு ஆதரவாக ITAT பெங்களூரு முக்கிய தீர்ப்பை வழங்கியுள்ளது. முறையான கணக்கு புத்தகங்கள் இல்லை என்பதற்காக விவசாய வருமானத்தை நிராகரிக்க முடியாது என நீதிமன்றம் தெளிவுபடுத்தியுள்ளது.
பெங்களூருவில் உள்ள வருமான வரி மேல்முறையீட்டு தீர்ப்பாயம் (ITAT), விவசாயிகளின் வங்கி டெபாசிட்கள் குறித்த விசாரணையில் மிக முக்கியமான உத்தரவை பிறப்பித்துள்ளது. வருமான வரிச் சட்டம் 1961-ன் பிரிவு 69A-ன் கீழ், ஒரு விவசாயியின் வங்கி டெபாசிட்களை வருமான வரி அதிகாரிகள் 'விளக்கப்படாத வருமானம்' (Unexplained Income) என்று முத்திரை குத்தியதை இந்த தீர்ப்பு ரத்து செய்துள்ளது.
கணக்கு வழக்கு குறித்த சர்ச்சை
பொதுவாக கார்ப்பரேட் நிறுவனங்கள் பராமரிப்பது போன்ற விரிவான கணக்கு புத்தகங்கள் இல்லை என்பதால், அந்த விவசாயியின் வருமானத்தை அதிகாரிகள் சந்தேகத்துடன் பார்த்தனர். விதைகளுக்கான செலவு, கூலி போன்ற விவரங்களுக்கு முறையான ஆவணங்கள் இல்லை என்ற காரணத்தைக் காட்டி, அந்த டெபாசிட்டுகளை வரிக்கு உட்பட்ட வருமானமாக வரித் துறை மாற்றியது. இது சாதாரண விவசாயிகளுக்கு பெரும் சுமையாக அமைந்தது.
ITAT வழங்கிய நீதி
விவசாயிகளின் எதார்த்த சூழலைப் புரிந்துகொண்ட ITAT, அதிகாரிகள் எதிர்பார்த்தது போன்ற கடினமான கணக்கு நடைமுறைகளை ஒரு சிறிய விவசாயியால் பராமரிக்க முடியாது என்று கூறியது. மாறாக, நில உரிமையாளர் ஆவணங்கள் (RTC) மற்றும் APMC விற்பனை ரசீதுகளை ஆதாரமாக ஏற்றுக்கொண்டது. நிலத்தின் அளவுக்கும், விற்பனை ரசீதுகளுக்கும் உள்ள தொடர்பை உறுதி செய்ததன் மூலம், ஆதாரமற்ற வரி நடவடிக்கைகளுக்கு முற்றுப்புள்ளி வைத்துள்ளது.
வரி செலுத்துவோர் கவனத்திற்கு
இந்த தீர்ப்பு விவசாயிகளுக்கு பெரும் வெற்றியாக இருந்தாலும், அனைத்து பணப்பரிமாற்றங்களும் வரிக்கு அப்பாற்பட்டவை என்று அர்த்தமல்ல. உங்கள் வருமானத்தை நிரூபிக்கும் பொறுப்பு உங்களுடையதுதான். நில ஆவணங்கள் மற்றும் விற்பனை ரசீதுகளை முறையாக வைத்திருந்தால் மட்டுமே இதுபோன்ற சட்டப் போராட்டங்களில் வெற்றி பெற முடியும். ஆவணங்கள் இல்லாத பட்சத்தில், வருமான வரித் துறையின் சோதனைகளுக்கு பயப்பட வேண்டிய சூழல் தொடரவே செய்யும் என்பதை நினைவில் கொள்க.