வருமான வரி மேல்முறையீட்டு தீர்ப்பாயம் (ITAT), ஒரு ஐடி பார்க் தொடர்பான வாடகை வருமான சர்ச்சையில் நில உரிமையாளர்களுக்கு ஆதரவாக தீர்ப்பு வழங்கியுள்ளது. வரி ஏய்ப்பு புகாரை நிராகரித்ததோடு, கேபிடல் கெயின்ஸ் வரியை கணக்கிடுவதற்கான காலக்கெடுவை 2005 ஆம் ஆண்டிற்கே நிர்ணயித்து உரிமையாளர்களுக்கு பெரும் நிம்மதியை அளித்துள்ளது.
ரியல் எஸ்டேட் மற்றும் வணிக சொத்து முதலீட்டாளர்களுக்கு ஒரு முக்கிய வழிகாட்டியாக இந்த தீர்ப்பு அமைந்துள்ளது. ஐடி பார்க் ஒன்றின் வாடகை வருமானத்தை மறைத்ததாக ஐந்திற்கும் மேற்பட்ட நில உரிமையாளர்கள் மீது சுமத்தப்பட்ட வரி ஏய்ப்பு புகார்களை பெங்களூரு ITAT பெஞ்ச் தள்ளுபடி செய்துள்ளது.
வரி சர்ச்சை ஏன்?
வருமான வரித்துறை, நில உரிமையாளர்கள் உருவாக்கிய பார்ட்னர்ஷிப் நிறுவனம் வெறும் வரி தவிர்ப்புக்கான ஒரு கருவி மட்டுமே என்று வாதிட்டது. பார்ட்னர்கள் பணத்தை திரும்ப எடுப்பதைச் சுட்டிக்காட்டி இது தனிநபர் வருமானம் என்று துறை குற்றம் சாட்டியது. ஆனால், அந்த நிறுவனம் சொந்த வங்கி கணக்கைக் கொண்டுள்ளதும், முறையாக ஐடி ரிட்டர்ன்ஸ் தாக்கல் செய்ததும், SEZ-ன் கோ-டெவலப்பராக அங்கீகரிக்கப்பட்டிருப்பதும் சட்டப்பூர்வமானது என தீர்ப்பாயம் உறுதிப்படுத்தியது.
கேபிடல் கெயின்ஸ் வரி குழப்பம் தீர்ந்தது
அடுத்த முக்கிய விஷயம் கேபிடல் கெயின்ஸ் டாக்ஸ். ஐடி பார்க் கட்டி முடிக்கப்பட்ட 2016-17 மதிப்பீட்டு ஆண்டை வைத்து வரி விதிக்க வருமான வரித்துறை முயன்றது. ஆனால், உரிமையாளர்கள் 2005-ல் கையெழுத்திட்ட ஜாயிண்ட் டெவலப்மென்ட் அக்ரிமெண்ட் (JDA) அடிப்படையில், சொத்து உரிமை மாற்றத்தை அன்றே உறுதிப்படுத்த வேண்டும் என்று வாதிட்டனர். இதனை ஏற்ற ITAT, சொத்து உரிமை பரிமாற்றம் நடந்த ஆண்டாக 2005-ஐ உறுதி செய்தது. இது உரிமையாளர்களுக்கு வரிச்சுமையைக் பெருமளவு குறைத்துள்ளது.
முதலீட்டாளர்கள் கவனத்திற்கு
இந்த தீர்ப்பு காட்டும் பாடம் ஒன்றே ஒன்றுதான்: உங்கள் ஜாயிண்ட் டெவலப்மென்ட் ஒப்பந்தங்கள் மற்றும் நிதி ஆவணங்கள் முறையாகவும், தெளிவாகவும் இருக்க வேண்டும். சரியான ஆவணங்கள் இருந்தால், வரி அதிகாரிகள் உங்கள் வருமானத்தை தன்னிச்சையாக மாற்றவோ அல்லது வரி விதிப்பு காலத்தை மாற்றவோ முடியாது என்பது இந்த தீர்ப்பின் மூலம் மீண்டும் நிரூபிக்கப்பட்டுள்ளது.