Hindustan Unilever-ன் Surf Excel மற்றும் Vim பிராண்டுகளை விமர்சித்து Beco நிறுவனம் நடத்திய #WarOnWhatsHidden பிரச்சாரத்தை நிறுத்த டெல்லி உயர் நீதிமன்றம் உத்தரவிட்டுள்ளது. ஆதாரமற்ற குற்றச்சாட்டுகளை முன்வைத்ததாகக் கூறி, ஒரு வாரத்திற்குள் விளம்பரங்களை நீக்க உத்தரவு பிறப்பிக்கப்பட்டுள்ளது.
டெல்லி உயர் நீதிமன்றம், Beco பிராண்டின் உரிமையாளரான Kwick Living (I) Private Limited நிறுவனத்திற்கு எதிராக இடைக்காலத் தடையை விதித்துள்ளது. #WarOnWhatsHidden என்ற பெயரில் நடத்தப்பட்ட இந்த விளம்பர பிரச்சாரத்தை உடனடியாக நிறுத்துமாறும், சந்தையில் உள்ள விளம்பரங்களை திரும்பப் பெறுமாறும் நீதிமன்றம் அதிரடியாக உத்தரவிட்டுள்ளது.
நீதிபதியின் கருத்து என்ன?
நீதிபதி அனுப் ஜே. பம்பானி இந்த விவகாரத்தை விசாரித்தபோது, Beco-வின் விளம்பரங்கள் 'ஒப்பீட்டு விளம்பரம்' (Comparative Advertising) என்ற வரம்பைத் தாண்டிச் சென்றுள்ளதாகக் குறிப்பிட்டார். HUL நிறுவனத்தின் தயாரிப்புகளைப் பயன்படுத்தினால் தோல் அரிப்பு, ஒவ்வாமை (Eczema) ஏற்படும் என நுகர்வோரைத் தவறாக வழிநடத்தியது ஆதாரமற்றது என்றும், இது ஒரு நிறுவனத்தின் நற்பெயரைக் கெடுக்கும் செயல் என்றும் நீதிமன்றம் சுட்டிக்காட்டியது.
ஒரு வார காலக்கெடு
இந்த அதிரடி உத்தரவின்படி, அடுத்த ஒரு வாரத்திற்குள் அனைத்து விளம்பரங்களையும் Beco நிறுவனம் நீக்க வேண்டும். மேலும், இதனை உறுதிப்படுத்தும் வகையில் பிரமாணப் பத்திரத்தை (Affidavit) நீதிமன்றத்தில் தாக்கல் செய்யவும் உத்தரவிடப்பட்டுள்ளது.
FMCG சந்தையில் என்ன தாக்கம்?
Hindustan Unilever போன்ற முன்னணி நிறுவனங்கள், தாங்கள் பயன்படுத்தும் பொருட்கள் அனைத்தும் பாதுகாப்பானவை என்றும், கடுமையான தரச் சோதனைகளுக்குப் பிறகே சந்தைப்படுத்தப்படுவதாகவும் வாதிட்டன. D2C பிராண்டுகள் மற்றும் பாரம்பரிய FMCG நிறுவனங்களுக்கு இடையிலான போட்டி அதிகரித்துவரும் நிலையில், இந்தத் தீர்ப்பு புதிய பிராண்டுகளுக்கு ஒரு எச்சரிக்கையாக அமைந்துள்ளது. தங்களின் தயாரிப்புகளை முன்னிலைப்படுத்தப் போட்டியாளர்களைத் தவறாகச் சித்தரிக்கும் யுக்தி இனி எடுபடாது என்பதை இந்த வழக்கு உறுதிப்படுத்தியுள்ளது.