மருந்தின் பெயர் குழப்பத்தை ஏற்படுத்துகிறது என்ற புகாரின் பேரில், Shreya Life Sciences தனது 'Lefoxin Biox' என்ற ஆன்டிபயாடிக் மருந்தின் பெயரை 2026-ம் ஆண்டு இறுதிக்குள் மாற்ற வேண்டும் என்று மும்பை உயர் நீதிமன்றம் உத்தரவிட்டுள்ளது.
மருந்து துறையில் பெயர்கள் எவ்வளவு முக்கியம் என்பதை இந்த வழக்கு மீண்டும் உணர்த்தியுள்ளது. Glaxo Group நிறுவனம், தனது இதய நோய்க்கான மருந்தான 'Lanoxin' பெயருடன், Shreya Life Sciences-ன் 'Lefoxin Biox' பெயரும் குழப்பத்தை ஏற்படுத்தும் வகையில் இருப்பதாக வழக்கு தொடர்ந்திருந்தது. இந்த வழக்கை விசாரித்த நீதிபதி சோமசேகர் சுந்தரேசன், இரண்டு மருந்துகளின் பெயர்களும் பார்ப்பதற்கும் உச்சரிப்பதற்கும் ஒரே மாதிரி இருப்பதாகக் குறிப்பிட்டு, இந்த மாற்றத்திற்கு உத்தரவிட்டுள்ளார்.
நோயாளி பாதுகாப்பு முக்கியம்
'Lanoxin' மருந்து 1950-களில் இருந்தே பயன்பாட்டில் உள்ளது. இரண்டு வெவ்வேறு சிகிச்சைக்கான மருந்துகளின் பெயர்கள் ஒரே மாதிரி இருந்தால், மருத்துவர்களுக்கும் நோயாளிகளுக்கும் குழப்பம் ஏற்பட்டு தவறான மருந்துகள் உட்கொள்ளும் ஆபத்து உள்ளது. இதைக் கருத்தில் கொண்டே இந்த அதிரடி தீர்ப்பு வழங்கப்பட்டுள்ளது.
காலக்கெடு மற்றும் சவால்கள்
நிர்வாக ரீதியாக இந்த மாற்றத்தைச் செய்ய Shreya Life Sciences நிறுவனத்திற்கு 2026 டிசம்பர் 31 வரை கால அவகாசம் வழங்கப்பட்டுள்ளது. 2027 ஜனவரி 1 முதல், புதிய பெயருடன் தான் மருந்துகளை விற்க வேண்டும்.
பெயரை மாற்றுவது என்பது வெறும் லேபிள் மாற்றம் மட்டுமல்ல; பேக்கேஜிங் வடிவமைப்பு, மருத்துவர்களிடம் புதிய பெயரை கொண்டு சேர்ப்பது, மற்றும் ஏற்கனவே உள்ள மார்க்கெட் நம்பிக்கையை புதிய பெயருக்கு மாற்றுவது எனப் பல சவால்கள் அந்நிறுவனத்திற்கு காத்திருக்கின்றன. பிராண்ட் பெயர்களை வைக்கும்போது இனிவரும் காலங்களில் நிறுவனங்கள் கூடுதல் கவனம் செலுத்த வேண்டியது கட்டாயமாகியுள்ளது.