பிரபல குயிக்-சர்வீஸ் உணவக நிறுவனமான Wow! Momo, உள்நாடு மற்றும் சர்வதேச அளவில் தனது கிளைகளை விரிவுபடுத்த ரூ.300 கோடி வரை நிதி திரட்ட திட்டமிட்டுள்ளது. அடுத்த 2 ஆண்டுகளுக்குள் IPO கொண்டு வரத் திட்டமிடும் இந்த நிறுவனம், பணவீக்கம் மற்றும் டெலிவரி ஆப் கமிஷன் போன்ற சவால்களை எதிர்கொண்டு வருகிறது.
கொல்கத்தாவைச் சேர்ந்த Wow! Momo நிறுவனம், அடுத்த 18 முதல் 24 மாதங்களுக்குள் பங்குச்சந்தையில் (IPO) நுழையத் திட்டமிட்டுள்ளது. இதற்காக தற்பொழுது ₹250 கோடி முதல் ₹300 கோடி வரை நிதி திரட்டத் தீவிர முயற்சியில் ஈடுபட்டுள்ளது. 2027 நிதி ஆண்டில் சுமார் ₹1,050 கோடி வருவாயை எட்ட வேண்டும் என்பதே இந்த நிறுவனத்தின் இலக்காகும்.
சர்வதேச விரிவாக்கம்
இந்த நிறுவனம் தனது உணவக நெட்வொர்க் மற்றும் பேக் செய்யப்பட்ட உணவுகள் (Packaged-food) வணிகம் என இரண்டையும் ஒரே நேரத்தில் பலப்படுத்தி வருகிறது. Softlogic Corp நிறுவனத்துடன் செய்துகொண்ட ஒப்பந்தத்தின் மூலம், 2026 இறுதிக்குள் இலங்கையில் கால் பதிக்கிறது. மேலும், UAE, அமெரிக்கா மற்றும் சீனா ஆகிய நாடுகளிலும் 2030-க்குள் தனது கிளைகளைத் தொடங்க திட்டமிட்டுள்ளது. பேக் செய்யப்பட்ட உணவுப் பிரிவைப் பொறுத்தவரை, தற்போதுள்ள நாடுகளுடன் கூடுதலாக கனடா மற்றும் மலேசியா உள்ளிட்ட 5 நாடுகளில் விரிவுபடுத்தப் பணிகள் நடந்து வருகின்றன.
சவால்களும் தீர்வுகளும்
தற்போது நிலவும் உணவுப் பொருட்களின் விலை உயர்வால், கோழி இறைச்சி, சமையல் எண்ணெய் மற்றும் பேக்கேஜிங் செலவுகள் 7-8% வரை அதிகரித்துள்ளன. இது லாப வரம்பில் (Profit Margin) பெரும் அழுத்தத்தை ஏற்படுத்தியுள்ளது. குறிப்பாக, ஆன்லைன் டெலிவரி ஆப் நிறுவனங்களுக்கு வழங்கப்படும் கமிஷன் கட்டணம், நிறுவனத்தின் மொத்த லாபத்தில் 10% வரை பங்கைப் பறிக்கிறது. இதைச் சமாளிக்க, மெனு விலையை சுமார் 6% உயர்த்தியும், மாற்று டெலிவரி முறைகளை ஆய்வு செய்தும் வருகிறது.
இந்தச் சவால்களுக்கு இடையிலும், Wow! Momo, Wow! China மற்றும் Wow! Chicken ஆகிய பிராண்டுகள் நல்ல வரவேற்பைப் பெற்றுள்ளன. நடப்பு நிதி ஆண்டின் முதல் பாதியில், ஒரே மாதிரியான விற்பனை வளர்ச்சி (Same-store sales) 14% ஆக உயர்ந்துள்ளது. Tiger Global மற்றும் Khazanah போன்ற பெரும் முதலீட்டாளர்களின் ஆதரவு பெற்றுள்ள இந்த நிறுவனம், தனது இலக்குகளைச் சரியாக எட்டுகிறதா என்பதைப் பொறுத்திருந்தே பார்க்க வேண்டும்.