எஜுகேஷன் டெக் துறையில் இயங்கி வரும் NoPaperForms நிறுவனம், புதிய ஐபிஓ (IPO) ஆவணங்களை செபியிடம் தாக்கல் செய்துள்ளது. இதில் ₹375 கோடி புதிய பங்குகளை வெளியிடவும், 3.84 கோடி பங்குகளை விற்பனை செய்யவும் (OFS) திட்டமிட்டுள்ளது.
ஐபிஓ அப்டேட்
கல்வி நிறுவனங்களுக்கான மென்பொருள் சேவைகளை வழங்கும் குருகிராமின் NoPaperForms Solutions நிறுவனம், தனது பொதுப் பங்கு வெளியீட்டிற்கான (IPO) வரைவு ஆவணங்களை செபியிடம் (SEBI) சமர்ப்பித்துள்ளது. இந்நிறுவனம் புதிய பங்குகள் மூலம் ₹375 கோடி திரட்ட இலக்கு வைத்துள்ளது. மேலும், முதலீட்டாளரான Startup Investments (Holding) Ltd சுமார் 3.84 கோடி பங்குகளை விற்பனை செய்ய உள்ளது.
பிசினஸ் மாடல் என்ன?
இந்நிறுவனம் மெரிட்டோ (Meritto) மற்றும் கொலெக்ஸோ (Collexo) ஆகிய பிளாட்ஃபார்ம்கள் மூலம் பள்ளி மற்றும் பல்கலைக்கழகங்களுக்கு அட்மிஷன், கட்டண வசூல் மற்றும் மாணவர் சேர்க்கை மேலாண்மை சேவைகளை வழங்குகிறது. இந்தியா, ஐக்கிய அரபு அமீரகம் மற்றும் தென்கிழக்கு ஆசியாவில் 1,000-க்கும் மேற்பட்ட வாடிக்கையாளர்களை இந்நிறுவனம் கொண்டுள்ளது.
வலுவான நிதி வளர்ச்சி
நிறுவனத்தின் நிதி நிலை அறிக்கையின்படி, மார்ச் 2026-ல் முடிவடைந்த நிதியாண்டில், அதன் தளம் மூலம் வசூலிக்கப்பட்ட கட்டணத்தின் அளவு ₹3,180 கோடியாக உயர்ந்துள்ளது. இது 2024 நிதியாண்டில் ₹1,541 கோடியாக இருந்தது குறிப்பிடத்தக்கது. அதேபோல், நிறுவனத்தின் நிகர லாபம் (Profit After Tax) முந்தைய ஆண்டின் ₹1.9 கோடியிலிருந்து, இந்த நிதியாண்டில் ₹11.9 கோடியாக அதிரடியாக உயர்ந்துள்ளது.
முதலீட்டு நோக்கம் மற்றும் ரிஸ்க்
திரட்டப்படும் நிதியை தொழில்நுட்ப மேம்பாட்டிற்கும், குறிப்பாக 'Agentic AI' தொழில்நுட்பத்தை ஒருங்கிணைக்கவும் பயன்படுத்த நிறுவனம் திட்டமிட்டுள்ளது. இருப்பினும், SaaS துறையில் நிலவும் கடும் போட்டி மற்றும் நிறுவன கையகப்படுத்துதலால் (Acquisitions) ஏற்படக்கூடிய சவால்களை முதலீட்டாளர்கள் கவனத்தில் கொள்ள வேண்டும். IIFL Capital Services மற்றும் SBI Capital Markets ஆகிய நிறுவனங்கள் இந்த ஐபிஓ-வின் முன்னணி மேலாளர்களாக செயல்படுகின்றன.