Used-car மார்க்கெட் பிளேஸான Cars24, தனது தலைமை அலுவலகத்தை சிங்கப்பூரிலிருந்து இந்தியாவுக்கு மாற்றியுள்ளது. வரும் 2027 ஏப்ரல் மாதத்திற்குள் IPO-க்கான வரைவு ஆவணங்களை (DRHP) தாக்கல் செய்யத் திட்டமிட்டுள்ளது.
பழைய கார்களை விற்பனை செய்யும் முன்னணி டிஜிட்டல் தளமான Cars24, இந்திய பங்குச்சந்தையில் நுழைய தீவிரமாகத் தயாராகி வருகிறது. இதற்காக, தனது கார்ப்பரேட் தலைமையகத்தை சிங்கப்பூரிலிருந்து இந்தியாவுக்கு மாற்றும் 'ரிவர்ஸ் பிளிப்' (Reverse Flip) சட்ட நடைமுறைகளை நிறுவனம் நிறைவு செய்து வருகிறது. வரி விதிப்பு மற்றும் முதலீட்டாளர்களின் நம்பிக்கையைப் பெற, இந்திய ஸ்டார்ட்அப்கள் பலவும் இப்போது இதே வழியைப் பின்பற்றி வருகின்றன.
விரிவாக்கத் திட்டம் மற்றும் முதலீடு
கடந்த 2022-ம் ஆண்டு நிதி திரட்டிய போது, இந்த நிறுவனத்தின் மதிப்பு $3.3 பில்லியன் டாலராக இருந்தது. அதன் பிறகு நிறுவனம் பெரிய அளவில் வெளி முதலீடுகளைப் பெறவில்லை என்றும், தற்போது கையில் உள்ள பணத்தை வைத்தே தொழிலை லாபகரமாக நடத்துவதாகவும் நிர்வாகம் தெரிவித்துள்ளது. தற்போது 25 நகரங்களில் இயங்கி வரும் Cars24, இதை 200 நகரங்களாக விரிவாக்கத் திட்டமிட்டுள்ளது. அத்துடன் வளைகுடா நாடுகள் மற்றும் ஆஸ்திரேலியாவிலும் தனது தடத்தை பதிக்கத் தயாராகி வருகிறது.
போட்டிகளும் சவால்களும்
இந்தியாவின் செகண்ட் ஹேண்ட் கார் மார்க்கெட் மிகப்பெரிய வளர்ச்சியை எட்டியிருந்தாலும், அதில் போட்டிகள் அதிகம். CarDekho, Spinny போன்ற நிறுவனங்கள் Cars24-க்கு கடும் சவாலாக உள்ளன. முன்பு இயங்கி வந்த OLX Autos, அதிக செலவுகள் காரணமாகத் தனது இந்தியச் செயல்பாடுகளை மூடியது குறிப்பிடத்தக்கது. சிறிய நகரங்களுக்கு விரிவாக்கம் செய்யும் போது, மார்க்கெட்டில் நிலவும் விலை மாற்றங்கள் மற்றும் போட்டித்தன்மையை எப்படிச் சமாளிக்கப் போகிறது என்பதே முதலீட்டாளர்களின் முக்கியக் கேள்வியாக இருக்கும்.
வெளிப்படைத்தன்மை
பொது நிறுவனமாக மாறுவதன் மூலம், தனது நிர்வாகத் தரத்தை உயர்த்தவும், வாடிக்கையாளர்கள் மற்றும் பங்குதாரர்களின் நம்பிக்கையைப் பெறவும் Cars24 திட்டமிடுகிறது. SEBI-யிடம் DRHP தாக்கல் செய்த பிறகு, அதன் நிதி நிலை, கடன் விவரங்கள் மற்றும் லாப வரம்பு குறித்த முழுமையான தெளிவு கிடைக்கும்.