அமெரிக்காவின் இலினாய்ஸ் மாகாணத்தில் உள்ள ஸ்ரீ வெங்கடேஸ்வர சுவாமி கோயிலில் நடத்தப்பட்ட துப்பாக்கிச்சூடு முயற்சி தொடர்பாக, 100-க்கும் மேற்பட்ட அமெரிக்க நாடாளுமன்ற உறுப்பினர்கள் FBI விசாரணையை வலியுறுத்தியுள்ளனர்.
அமெரிக்காவின் இலினாய்ஸ் மாகாணம், அரோரா பகுதியில் உள்ள ஸ்ரீ வெங்கடேஸ்வர சுவாமி கோயிலில் நடந்த துப்பாக்கிச்சூடு முயற்சியை வெறும் குற்றச்செயலாகப் பார்க்காமல், ஒரு 'வெறுப்புணர்வுக் குற்றம்' (Hate Crime) கோணத்தில் விசாரிக்க வேண்டும் என 105 அமெரிக்க எம்.பி.க்கள் கூட்டாக வலியுறுத்தியுள்ளனர். இந்த நடவடிக்கைக்கு ராஜா கிருஷ்ணமூர்த்தி தலைமை தாங்கியுள்ளார்.
நடந்ததென்ன?
19 வயது இளைஞர் ஒருவர் துப்பாக்கியுடன் கோயிலுக்குள் நுழைந்து தாக்குதல் நடத்த முயன்றார். துப்பாக்கியில் ஏற்பட்ட தொழில்நுட்பக் கோளாறு காரணமாக ஒரு பெரும் உயிரிழப்பு தவிர்க்கப்பட்டது. இந்தச் சம்பவத்தை வெறும் தனிநபர் குற்றமாகக் கருதாமல், இதன் பின்னணியில் மத ரீதியான அல்லது இன ரீதியான உள்நோக்கம் உள்ளதா என்பதை கண்டறியவே இந்த விசாரணை கோரப்பட்டுள்ளது.
அதிகரிக்கும் வெறுப்புப் பிரச்சாரம்
இந்தக் கடிதத்தில் சுட்டிக்காட்டப்பட்டுள்ள அதிர்ச்சிகரமான தகவல்கள்:
- எக்ஸ் (X) தளத்தில் தெற்காசியர்களுக்கு எதிரான வெறுப்புப் பேச்சுக்கள் கடந்த காலங்களுடன் ஒப்பிடுகையில் 240% அதிகரித்துள்ளது.
- கார்னகி எண்டோவ்மென்ட் ஆய்வுப்படி, 2025-க்கு பிறகு பாதியளவு இந்திய-அமெரிக்கர்கள் ஏதோ ஒரு வகையில் இனவெறித் தாக்குதல்களை எதிர்கொண்டுள்ளனர்.
அமெரிக்காவின் உள்துறை பாதுகாப்புத் துறை மற்றும் கல்வித் துறையின் சில தகவல்கள் சிறுபான்மையினருக்கு எதிரான சூழலை உருவாக்குவதாக இந்த எம்.பி.க்கள் குற்றம் சாட்டியுள்ளனர். தாக்குதல் நடத்திய நபரை தீவிரவாதம் நோக்கித் தூண்டியது யார் என்பதைக் கண்டறியவே இந்த விரிவான FBI விசாரணை கோரப்பட்டுள்ளது.