UK Home Office கொண்டுவந்துள்ள புதிய விசா விதிகளால், சர்வதேச மாணவர்களின் சேர்க்கை சலுகையை பல்கலைக்கழகங்கள் ரத்து செய்து வருகின்றன. விசா நிராகரிப்பு விகிதத்தை **5%**-க்கு கீழே வைத்திருக்க வேண்டிய கட்டாயம் ஏற்பட்டுள்ளதால், பல வெளிநாட்டு மாணவர்களின் கல்வி கனவு கேள்விக்குறியாகியுள்ளது.
பிரிட்டனில் கல்வி பயில விரும்பும் சர்வதேச மாணவர்களுக்கு சிக்கலான சூழல் உருவாகியுள்ளது. ஜூன் 1, 2026 முதல், UK Home Office விசா விதிகளில் கடும் கட்டுப்பாடுகளை விதித்துள்ளது. இதன்படி, பல்கலைக்கழகங்கள் தங்கள் மாணவர் விசா நிராகரிப்பு விகிதத்தை 5%-க்கும் குறைவாக வைத்திருக்க வேண்டும். இதற்கு முன்பு இந்த வரம்பு 10% ஆக இருந்தது குறிப்பிடத்தக்கது.
அனுமதி ரத்து ஏன்?
பல்கலைக்கழகங்களின் ஸ்பான்சர்ஷிப் உரிமத்தை (Sponsorship License) தக்கவைக்க, விசா நிராகரிப்பு விகிதத்தை குறைக்க வேண்டிய கட்டாயத்தில் நிர்வாகங்கள் உள்ளன. அதிக ஆபத்துள்ள (High-risk) நாடுகளைச் சேர்ந்த மாணவர்களின் விண்ணப்பங்கள் நிராகரிக்கப்படுவது, பல்கலைக்கழகங்களின் ஒட்டுமொத்த விகிதத்தை பாதிக்கிறது. இதனால், சில விண்ணப்பங்களை முன்கூட்டியே ரத்து செய்வதன் மூலம் தங்கள் உரிமத்தை காப்பாற்ற பல்கலைக்கழகங்கள் முற்படுகின்றன.
புள்ளிவிவரங்களின்படி, 2026-ன் முதல் பாதியில் விசா நிராகரிப்பு விகிதம் 10.5% ஆக உயர்ந்தது. இது 2025-ல் வெறும் 2.3% ஆக மட்டுமே இருந்தது. இந்தியாவைப் பொறுத்தவரை, இந்த நிராகரிப்பு விகிதம் 1.2%-லிருந்து 5.2% ஆக உயர்ந்துள்ளது.
நிதி பாதிப்பு மற்றும் எதிர்காலம்
சர்வதேச மாணவர்களிடமிருந்து வரும் கல்விக்கட்டணம் (Tuition Fees) UK பல்கலைக்கழகங்களின் முக்கிய வருமான ஆதாரமாகும். இந்த வருமானம் குறைந்தால், ஆராய்ச்சிப் பணிகள் மற்றும் உள்நாட்டு கல்வித் திட்டங்களுக்கு நிதி நெருக்கடி ஏற்படும். இது ஊழியர்கள் குறைப்பு அல்லது பாடப்பிரிவுகள் நிறுத்தப்படுவதற்கு வழிவகுக்கலாம்.
மட்டுமல்லாது, இங்கிலாந்தின் கல்வி முறை மீதான நம்பகத்தன்மை குறைந்து, மாணவர்கள் கனடா அல்லது ஆஸ்திரேலியா போன்ற நாடுகளுக்கு இடம்பெயரும் அபாயமும் ஏற்பட்டுள்ளது.