வங்கதேசத்தின் முன்னாள் விமானப்படை தளபதி Sheikh Abdul Hannan, ஊழல் புகாரில் கத்தார் அதிகாரிகளால் கைது செய்யப்பட்டுள்ளார். இன்டர்போல் விடுத்த நோட்டீஸின் அடிப்படையில் இந்த நடவடிக்கை எடுக்கப்பட்டுள்ளது.
வங்கதேசத்தின் முன்னாள் விமானப்படை தளபதி மார்ஷல் Sheikh Abdul Hannan, அக்டோபர் 15 அன்று கத்தாரில் கைது செய்யப்பட்டுள்ளார். வங்கதேச ஊழல் தடுப்பு ஆணையம் (ACC) அளித்த புகாரின் பேரில், இன்டர்போல் இவருக்கு எதிராக நோட்டீஸ் பிறப்பித்திருந்தது.
ஊழல் புகார்கள் என்ன?
ஜூன் 2021 முதல் ஜூன் 2024 வரை பதவி வகித்த காலத்தில், தனது வருமானத்திற்கு அதிகமாக சொத்து சேர்த்ததாக இவர் மீது குற்றம் சாட்டப்பட்டுள்ளது. குறிப்பாக, ₹3.28 கோடி மதிப்பிலான முறையற்ற சொத்துக்கள் மற்றும் இவருடைய தனிப்பட்ட 6 வங்கி கணக்குகளில் ₹27.63 கோடி அளவிற்கு சந்தேகத்திற்குரிய பணப் பரிவர்த்தனைகள் நடந்துள்ளதாக விசாரணையில் தெரியவந்துள்ளது.
விரிவடையும் விசாரணை
இந்த விவகாரம் இவரது குடும்ப உறுப்பினர்களுக்கும் விஸ்தரிக்கப்பட்டுள்ளது. இவரது மனைவியின் பெயரில் உள்ள 32 வங்கி கணக்குகளில் ₹1.91 கோடி மதிப்பிலான கணக்கில் வராத சொத்துக்கள் இருப்பதை அதிகாரிகள் கண்டறிந்துள்ளனர். மேலும், கமிஷன் சட்டங்கள் மற்றும் பணமோசடி தடுப்புச் சட்டத்தின் கீழ் வழக்குகள் பதிவு செய்யப்பட்டுள்ளன.
முன்னதாகவே டாக்காவில் உள்ள நீதிமன்றம் இவருடைய சொத்துக்களை முடக்கவும், வங்கிக் கணக்குகளைச் சீல் வைக்கவும் உத்தரவிட்டிருந்தது. பயணத் தடைகள் இருந்தபோதிலும், அவர் வங்கதேசத்தை விட்டு வெளியேறியுள்ளார். கனடா மற்றும் துபாய் உள்ளிட்ட நாடுகளில் இவரது சொத்துக்கள் பரவியிருக்கலாம் என விசாரணையில் தெரியவந்துள்ளது.