E20 எத்தனால் கலந்த பெட்ரோலை பயன்படுத்தினால், உங்கள் மோட்டார் இன்சூரன்ஸ் க்ளைம் (Insurance Claim) நிராகரிக்கப்படாது என இன்சூரன்ஸ் நிறுவனங்கள் தெளிவுபடுத்தியுள்ளன. க்ளைம்கள் பாலிசி விதிமுறைகள் மற்றும் சேதத்தின் காரணத்தைப் பொறுத்தது, பெட்ரோல் வகையைப் பொறுத்ததல்ல.
இந்தியாவில் E20 எத்தனால் கலந்த பெட்ரோல் பயன்பாடு அதிகரித்து வரும் நிலையில், வாகன உரிமையாளர்கள் மத்தியில் மோட்டார் இன்சூரன்ஸ் (Motor Insurance) குறித்து சில சந்தேகங்கள் எழுந்தன.
இந்நிலையில், இதுகுறித்து இன்சூரன்ஸ் துறை நிபுணர்கள் முக்கிய தகவலை வெளியிட்டுள்ளனர். E20 பெட்ரோலை பயன்படுத்தினால் மட்டும், உங்கள் மோட்டார் இன்சூரன்ஸ் பாலிசி செல்லாது என ஆகிவிடாது என்று அவர்கள் தெளிவுபடுத்தியுள்ளனர். ICICI Lombard நிறுவனம் வெளியிட்டிருந்த ஒரு இணையப் பக்க அறிவிப்பு, இதுபோன்ற சந்தேகங்களுக்கு வித்திட்டது.
க்ளைம் பெறுவதற்கான தகுதிகள் என்ன?
மோட்டார் இன்சூரன்ஸ் பாலிசியின் அடிப்படை விதி என்னவென்றால், க்ளைம் ஒப்புதல் என்பது பாலிசியின் விதிமுறைகள் மற்றும் சேதத்தின் தன்மையைச் சார்ந்தது. இன்சூரன்ஸ் நிறுவனங்கள், வாகனத்தில் பயன்படுத்தப்படும் பெட்ரோல் கலவையைப் பொறுத்து அல்லாமல், உண்மையில் என்ன காரணத்தால் சேதம் ஏற்பட்டதோ, அதைக் கொண்டே க்ளைம்களை மதிப்பிடுகின்றன. உதாரணத்திற்கு, விபத்து அல்லது திருட்டு போன்ற காரணங்களால் ஏற்படும் சேதங்களுக்கு, காப்பீட்டு பாலிசியில் உள்ளபடி க்ளைம் கிடைக்கும். பெட்ரோல் வகை இங்கு ஒரு பொருட்டல்ல.
விபத்து சேதம் Vs மெக்கானிக்கல் கோளாறு
வாகன உரிமையாளர்கள் ஒரு முக்கிய வித்தியாசத்தை புரிந்துகொள்ள வேண்டும்: விபத்து சேதம் (Accidental Damage) மற்றும் மெக்கானிக்கல் கோளாறு (Mechanical Breakdown) ஆகியவற்றுக்கு இடையே உள்ள வேறுபாடு.
பொதுவாக, இன்சூரன்ஸ் பாலிசிகள் மெக்கானிக்கல் அல்லது எலக்ட்ரிக்கல் கோளாறுகளையோ, தேய்மானத்தையோ (Wear and Tear) ஈடுசெய்யாது. ஒருவேளை இன்ஜின் பழுதடைந்தால், இன்சூரன்ஸ் நிறுவனம் அதன் காரணத்தை ஆராயும். நீண்ட நாள் தேய்மானம் காரணமாகவோ அல்லது உற்பத்தியாளர் குறிப்பிட்ட எரிபொருள் வகையைத் தவிர வேறு எதையாவது பயன்படுத்தக்கூடாது என்று தெரிந்தும் பயன்படுத்தியதன் காரணமாகவோ சேதம் ஏற்பட்டிருந்தால், க்ளைம் நிராகரிக்கப்பட வாய்ப்புள்ளது.
இருப்பினும், எரிபொருள் வகைதான் சேதத்திற்குக் காரணம் என்பதை இன்சூரன்ஸ் நிறுவனம்தான் நிரூபிக்க வேண்டும். வெறும் பெட்ரோல் வகையை மட்டும் காரணம் காட்டி, க்ளைமை நிராகரிக்க முடியாது.
வாகன உரிமையாளர்களுக்கான சிறந்த நடைமுறைகள்
எரிபொருள் தரங்களில் ஏற்படும் மாற்றங்களுக்கு மத்தியில், உங்கள் இன்சூரன்ஸ் க்ளைம் தகுதியைப் பாதுகாக்க சிறந்த வழி, வாகன உற்பத்தியாளர் பரிந்துரைக்கும் பராமரிப்பு அட்டவணையைப் பின்பற்றுவது. வாகனத்தின் சர்வீஸ் பதிவேடுகள் மற்றும் பராமரிப்பு விவரங்களை முறையாகப் பராமரிப்பது, நீங்கள் வாகனத்தை பொறுப்புடன் வைத்திருக்கிறீர்கள் என்பதற்கான முக்கிய ஆதாரமாக இருக்கும்.
எத்தனால் கலந்த எரிபொருளைப் பயன்படுத்துவதற்கு சிறப்பு ஆவணங்கள் தேவையில்லை என்றாலும், எரிபொருள் தரம் காரணமாக திடீரென ஒரு மெக்கானிக்கல் பிரச்சனை ஏற்பட்டால், வழக்கமான எரிபொருள் ரசீதுகள் உதவியாக இருக்கும்.
எரிபொருள் கொள்கை எத்தனால் பயன்பாட்டிற்கு மாறிக்கொண்டிருந்தாலும், இன்சூரன்ஸ் ஒப்பந்தங்கள் விபத்து இழப்புகளை மையமாகக் கொண்டுள்ளன. எனவே, மெக்கானிக்கல் நம்பகத்தன்மை தொடர்பான பிரச்சனைகளைத் தவிர்க்க, வாகனத்தை உற்பத்தியாளரின் விவரக்குறிப்புகளுக்கு ஏற்ப பராமரிப்பது முக்கியம்.