பல ஹெல்த் இன்சூரன்ஸ் பாலிசிகளில் 'ரெஸ்டோரேஷன்' (Restoration) அல்லது 'ரீஃபில்' (Refill) வசதி வழங்கப்படுகிறது. ஆனால், இதில் உள்ள பல நிபந்தனைகளைத் தெரிந்துகொள்ளாமல் இருப்பது மருத்துவ அவசர காலங்களில் உங்களுக்கு அதிக செலவை ஏற்படுத்தலாம்.
ஹெல்த் இன்சூரன்ஸில் 'ரெஸ்டோரேஷன்' என்பது உங்கள் பாலிசி தொகையை (Sum Insured) முழுமையாகப் பயன்படுத்திய பிறகு, மீண்டும் அதே தொகையை வழங்கும் ஒரு பாதுகாப்பு வளையம். இது பார்ப்பதற்குச் சிறப்பாகத் தெரிந்தாலும், இதை மட்டுமே நம்பி அடிப்படை இன்சூரன்ஸ் தொகையை (Base Cover) குறைப்பது பெரிய நிதி ஆபத்தாகும்.
1. எப்போது ஆக்டிவேட் ஆகும்?
பல பாலிசிகளில், உங்கள் அடிப்படை தொகை 100% தீர்ந்தால் மட்டுமே ரெஸ்டோரேஷன் வசதி தொடங்கும். அதாவது, உங்கள் தொகை தீரும் வரை ஏற்படும் செலவுகளை நீங்களே கையிலிருந்து செலுத்த வேண்டியிருக்கும். எனவே, உங்கள் பாலிசியில் முழுமையாகத் தீர்ந்த பிறகுதான் இது கிடைக்குமா அல்லது பாதியிலேயே கிடைக்குமா என்பதைச் சரிபார்க்கவும்.
2. அதே நோய்க்கு சிகிச்சை கிடைக்குமா?
இதுதான் மிக முக்கியமான நிபந்தனை. பல பாலிசிகளில், முந்தைய கிளைமுக்கு காரணமான அதே நோய்க்கு இந்த ரெஸ்டோரேஷன் தொகையைப் பயன்படுத்த முடியாது என்று விதி இருக்கும். புற்றுநோய் அல்லது இதய நோய் போன்ற தொடர் சிகிச்சை தேவைப்படும் நோய்களுக்கு இது மிகப்பெரிய பின்னடைவாக அமையும்.
3. 'அன்லிமிடெட்' விளம்பரங்களை நம்பாதீர்கள்
குறைந்த பிரீமியத்தில் அதிக ரீஃபில் கிடைப்பதாக விளம்பரங்களை நம்பி, அடிப்படை பாலிசி தொகையை மிகக் குறைவாகத் தேர்ந்தெடுப்பது தவறு. ரெஸ்டோரேஷன் என்பது ஒரு துணை வசதி மட்டுமே, அடிப்படை பாதுகாப்பு அல்ல. அவசர காலத்தில் இது உங்கள் முழுத் தேவைக்கும் போதுமானதாக இருக்காது.
4. மறைமுகக் கட்டுப்பாடுகள் (Hidden Exclusions)
'ஃபுல் ரெஸ்டோரேஷன்' என்று கூறினாலும், சில பாலிசிகள் இதனை ஹாஸ்பிட்டல் செலவுகளுக்கு மட்டுமே வழங்குகின்றன. அதாவது, ஹாஸ்பிட்டலுக்குச் செல்வதற்கு முந்தைய மற்றும் பிந்தைய செலவுகள் (Pre/Post-hospitalization) இதில் அடங்காது. பாலிசி ஆவணத்தில் உள்ள இந்த நுணுக்கமான விதிமுறைகளை கவனமாக வாசிப்பது மட்டுமே உங்களை நிதி நெருக்கடியிலிருந்து காக்கும்.