Coal India: நிலக்கரியில் இருந்து கெமிக்கல் வரை! அதிரடியாக முதலீடு செய்யும் பிரம்மாண்ட திட்டம்

நிலக்கரி உற்பத்தியில் உலக அளவில் முன்னணியில் இருக்கும் Coal India, தற்போது தனது வணிக உத்தியை மாற்றியமைத்துள்ளது. இதுவரை சுரங்கத் தொழிலை மட்டுமே நம்பியிருந்த நிறுவனம், தற்போது கெமிக்கல் மற்றும் எரிசக்தித் துறையில் ₹69,346 கோடி முதலீடு செய்ய முடிவெடுத்துள்ளது.

மெகா திட்டங்கள் மற்றும் கூட்டணிகள்

இந்த நிதியில் பெரும்பகுதி நிலக்கரியை கெமிக்கலாக மாற்றும் திட்டங்களுக்கு ஒதுக்கீடு செய்யப்பட்டுள்ளது. குறிப்பாக, Talcher Fertilisers Limited திட்டத்திற்கு ₹19,062 கோடி முதலீட்டில் ஆண்டுக்கு 1.27 மில்லியன் டன் யூரியா தயாரிக்க இலக்கு நிர்ணயிக்கப்பட்டுள்ளது. அதேபோல், Bharat Coal Gasification & Chemicals Limited திட்டத்தில் ₹25,015 கோடி முதலீட்டில் அமோனியம் நைட்ரேட் உற்பத்தி செய்யப்படுகிறது. தொழில்நுட்ப சிக்கல்களைத் தவிர்க்க, Bharat Petroleum Corporation உடன் இணைந்து சிந்தெடிக் நேச்சுரல் கேஸ் தயாரிக்கும் பணியிலும் இறங்கியுள்ளது.

மின்சாரம் மற்றும் புதுப்பிக்கத்தக்க எரிசக்தி

கெமிக்கல் மட்டுமின்றி, Damodar Valley Corporation உடன் இணைந்து 2x800 MW திறன் கொண்ட அனல் மின் திட்டங்களிலும் நிறுவனம் கவனம் செலுத்துகிறது. தெலுங்கானாவில் 187.5 MW/750 MWh மற்றும் ஒடிசாவில் 80 MW/320 MWh என பிரம்மாண்ட பேட்டரி ஸ்டோரேஜ் திட்டங்களையும் Coal India உருவாக்கி வருகிறது.

முதலீட்டாளர்கள் கவனத்திற்கு

Coal India எப்போதும் நல்ல டிவிடெண்ட் வழங்கும் நிறுவனமாக அறியப்படுகிறது. தற்போது லாபத்தை புதிய திட்டங்களில் முதலீடு செய்வது நீண்டகால வளர்ச்சிக்கு வழிவகுக்கும் என்றாலும், சுரங்கத் தொழிலுக்கு முற்றிலும் மாறுபட்ட இந்தத் தொழில்நுட்பத் துறைகளில் வெற்றி பெறுவது சவாலான ஒன்று. இதைச் சமாளிக்க, நிறுவனம் நேரடியாக பெரிய முதலீடு செய்யாமல், 'Stage-gated' முறையைப் பின்பற்றி, சிறிய அளவிலான பைலட் ப்ராஜெக்ட்கள் மூலம் வெற்றி உறுதி செய்யப்பட்ட பின்பே முழுமையாகச் செயல்படத் திட்டமிட்டுள்ளது. மேலும், எதிர்காலத் தேவையை உணர்ந்து கிராஃபைட் மற்றும் அரிதான கனிமங்கள் (Rare Earth Elements) பிரிவிலும் நிறுவனம் கால்பதித்துள்ளது. இந்தத் திட்டங்களின் காலக்கெடு மற்றும் லாபத்தன்மை எப்படி அமையும் என்பதைப் பொறுத்தே நிறுவனத்தின் அடுத்தகட்ட நகர்வு அமையும்.