குஜராத் மாநிலம் சூரத் பகுதியில் அரசு தடுப்பூசி முகாமின் போது, காய்ச்சல் மருந்துக்கு பதிலாக தவறுதலாக நீரிழிவு நோய் மாத்திரை வழங்கப்பட்டதால் 5 குழந்தைகள் மருத்துவமனையில் அனுமதிக்கப்பட்டுள்ளனர்.
குஜராத்தின் சூரத் பகுதியில் நடந்த அரசு தடுப்பூசி முகாமில் (Mamta Diwas) ஏற்பட்ட பெரும் மருத்துவ குளறுபடி அதிர்ச்சியை ஏற்படுத்தியுள்ளது. கடந்த செப்டம்பர் 23 அன்று, பால்சானா-01 துணை மையத்தில் தடுப்பூசி போட்ட குழந்தைகளுக்கு காய்ச்சலைத் தடுக்கும் பாராசிட்டமால் மருந்துக்கு பதிலாக, நீரிழிவு நோயாளிகளுக்கு வழங்கப்படும் 2 மி.கி குளைம்பெரைடு (Glimepiride) மாத்திரைகள் வழங்கப்பட்டுள்ளன.
இந்தத் தவறு காரணமாக, 3.5 மாதக் குழந்தை உட்பட 5 குழந்தைகளின் உடல்நிலை திடீரென மோசமடைந்தது. உடனடியாக அவர்கள் தீவிர சிகிச்சைப் பிரிவில் (ICU) அனுமதிக்கப்பட்டு, தற்போது அவர்கள் உடல்நிலை சீராக இருப்பதாக அதிகாரிகள் தெரிவித்துள்ளனர். குஜராத் சுகாதாரத்துறை அமைச்சர் பிரபுல் பன்ஷேரியா, இதை மிகப்பெரிய கவனக்குறைவு என சாடியுள்ளார்.
எடுக்கப்பட்ட நடவடிக்கைகள்
சம்பவம் குறித்து உடனடியாக விசாரணை நடத்தப்பட்டு, இதற்கு காரணமான இந்தூபென் ரத்திலால் சவுத்ரி என்ற மூன்றாம் நிலை சுகாதார ஊழியர் உடனடியாக பணியிடை நீக்கம் செய்யப்பட்டுள்ளார். அவர் விசாரணை முடியும் வரை வேறு எந்த வேலையிலும் ஈடுபடக்கூடாது என உத்தரவிடப்பட்டுள்ளது. மேலும், நீரிழிவு மாத்திரைகள் எப்படி தடுப்பூசி மருந்துகள் இருக்கும் இடத்திற்கு வந்தன என்பது குறித்து துறை ரீதியான விசாரணை முடுக்கி விடப்பட்டுள்ளது.
இந்தச் சம்பவம் பொது சுகாதாரக் கட்டமைப்பில் உள்ள மருந்து விநியோக முறைகளில் இருக்கும் பலவீனத்தை வெளிச்சம் போட்டுக் காட்டுகிறது. குறிப்பாக, மருந்து மேலாண்மை மற்றும் பாதுகாப்பு விதிமுறைகளை மறுபரிசீலனை செய்ய வேண்டிய கட்டாயத்தை இது உருவாக்கியுள்ளது.