புற்றுநோய் சிகிச்சைக்கு பயன்படும் Nivolumab மருந்தின் விலை, பயோசிமிலர் (Biosimilars) வருகையால் ₹1 லட்சத்தில் இருந்து ₹30,000 ஆக குறைந்துள்ளது. இதனால் புற்றுநோய் நோயாளிகளுக்கு பெரிய நிம்மதி கிடைத்துள்ளது.
இந்தியாவின் புற்றுநோய் சிகிச்சை துறையில் ஒரு முக்கிய மாற்றம் நிகழ்ந்துள்ளது. விலை உயர்ந்த இம்யூனோதெரபி மருந்தான Nivolumab, தற்போது புதிய பயோசிமிலர் நிறுவனங்களின் வருகையால் கணிசமாக குறைந்துள்ளது. முன்பு ஒரு சைக்கிளுக்கு ₹1 லட்சம் மேல் இருந்த இந்த மருந்து, இப்போது ₹30,000 என்ற விலையில் கிடைக்கிறது. இதனால் சாதாரண மக்களும் இந்த சிகிச்சையை பெற்றுக்கொள்ளும் சூழல் உருவாகியுள்ளது.
மருத்துவ தாக்கம் என்ன?
Tata Memorial Centre-ன் தரவுகளின்படி, Nivolumab சுமார் 25 வகையான கட்டிகளுக்கு (Tumors) மருந்தாக செயல்படுகிறது. ஆரம்ப நிலை குடல் புற்றுநோய் முதல் மெலனோமா வரை பலவற்றிற்கு இது சிறந்த தீர்வாக உள்ளது. இதனால் ஆபத்தான அறுவை சிகிச்சைகள் மற்றும் கீமோதெரபி சிகிச்சைகளை தவிர்க்க முடியும் என்பது குறிப்பிடத்தக்கது.
ஹாஸ்பிடல்களின் பங்கு முக்கியம்!
மருந்து நிறுவனங்கள் விலையை குறைத்தாலும், ஹாஸ்பிடல்கள் அதிக லாபம் தரும் பழைய பிராண்டட் மருந்துகளை ஊக்குவித்தால், நோயாளிகளுக்கு முழு பலன் கிடைக்காது. ஹாஸ்பிடல்களின் கொள்முதல் கொள்கைகள் (Procurement Policy) தான் நோயாளியின் செலவை தீர்மானிக்கப் போகிறது.
அரசின் கட்டுப்பாடு
National Pharmaceutical Pricing Authority (NPPA) அமைப்பு, 137 வகையான புற்றுநோய் மருந்துகளின் வர்த்தக வரம்புகளை (Trade Margins) கட்டுப்படுத்தியுள்ளது. இதன் மூலம் மக்களுக்கு ஆண்டுக்கு சுமார் ₹2,500 கோடி சேமிப்பு கிடைக்கும் என எதிர்பார்க்கப்படுகிறது. மேலும் சந்தையில் இன்னும் 4 பயோசிமிலர்கள் நுழைய தயாராக இருப்பதால், வரும் காலங்களில் விலையில் மேலும் சரிவு ஏற்பட வாய்ப்புள்ளது.