மகாராஷ்டிரா உணவு மற்றும் மருந்து நிர்வாகத் துறை (FDA) பாகிஸ்தானில் இருந்து இறக்குமதி செய்யப்பட்ட மூன்று அழகுசாதன கிரீம்களுக்கு தடை விதித்துள்ளது. நாக்பூரில் 18 பெண்கள் இந்த கிரீம்களை பயன்படுத்தியதால் சிறுநீரக பாதிப்புக்குள்ளானதை அடுத்து இந்த நடவடிக்கை எடுக்கப்பட்டுள்ளது.
நச்சுத்தன்மையால் பறிபோன ஆரோக்கியம்!
மகாராஷ்டிரா மாநில உணவு மற்றும் மருந்து நிர்வாகத் துறை (FDA) அதிரடியாக இறக்குமதி செய்யப்பட்ட மூன்று பாகிஸ்தானி அழகுசாதன கிரீம்களை தடை செய்துள்ளது. குறிப்பாக, Goree Beauty Cream, Face Fresh Gold, மற்றும் Golden Star Beauty Cream ஆகிய கிரீம்களின் விற்பனை, விநியோகம் மற்றும் பயன்பாட்டிற்கு உடனடியாக தடை விதிக்கப்பட்டுள்ளது.
நாக்பூரில் 18 பெண்கள் இந்த கிரீம்களை நீண்ட காலமாக பயன்படுத்தியதால் கடுமையான சிறுநீரக பாதிப்புக்குள்ளானதாக புகார்கள் எழுந்தன. இதைத் தொடர்ந்து நடத்தப்பட்ட ஆய்வக சோதனைகளில், இந்த கிரீம்களில் அனுமதிக்கப்பட்ட அளவை விட அதிகமான பாதரசம் (Mercury) மற்றும் ஈயம் (Lead) நச்சுத்தன்மை கண்டறியப்பட்டுள்ளது. இந்த கன உலோகங்கள் தோலின் வழியாக இரத்தத்தில் கலந்து, சிறுநீரகங்களுக்கு கடுமையான பாதிப்பை ஏற்படுத்தக்கூடியவை.
ஆன்லைன் விற்பனைக்கும் கட்டுப்பாடு!
இந்த தடை செய்யப்பட்ட கிரீம்கள் ஆன்லைன் தளங்கள் மற்றும் சமூக ஊடகங்கள் வழியாக இந்தியாவில் விற்கப்பட்டு வந்துள்ளன. இந்த நிலைமையை கட்டுப்படுத்த, மும்பை காவல்துறை ஒரு உள்ளூர் கடைக்காரர் மீது வழக்கு பதிவு செய்துள்ளது.
Meesho போன்ற ஈ-காமர்ஸ் நிறுவனங்களும் இது குறித்து விசாரணை நடத்தி வருகின்றன. தங்களது தளத்தில் இருந்து இந்த தயாரிப்புகளை நீக்குவதாகவும், நுகர்வோர் பாதுகாப்பிற்கு முன்னுரிமை அளிப்பதாகவும் Meesho நிறுவனம் தெரிவித்துள்ளது. டிஜிட்டல் தளங்கள் மூலம் ஆபத்தான, அங்கீகரிக்கப்படாத இறக்குமதிகள் இந்திய நுகர்வோரை சென்றடைவதை தடுப்பது ஒரு பெரிய சவாலாக உருவெடுத்துள்ளது.
மேலும் இது போன்ற ஆபத்தான இறக்குமதிகளை தடுக்க, புதிய விதிமுறைகள் மற்றும் கடுமையான அமலாக்க நடவடிக்கைகள் எடுக்கப்படலாம் என எதிர்பார்க்கப்படுகிறது.