தரமற்ற மருந்து தயாரிப்பில் ஈடுபட்ட ஹிமாச்சல பிரதேசத்தில் உள்ள 96 பார்மா நிறுவனங்களை அதிகாரிகள் அதிரடியாக மூடியுள்ளனர். CDSCO அமைப்பின் எச்சரிக்கையைத் தொடர்ந்து இந்த நடவடிக்கை எடுக்கப்பட்டுள்ளது. இந்தியாவின் மருந்து தேவையில் சுமார் 35% இந்த மாநிலத்திலிருந்து விநியோகிக்கப்படுவது குறிப்பிடத்தக்கது.
என்ன நடந்தது?
மத்திய மருந்து தரக்கட்டுப்பாட்டு அமைப்பான CDSCO, ஹிமாச்சல பிரதேசத்தில் இருந்து தயாரிக்கப்பட்ட 92 மருந்து பேட்சுகளில் கடுமையான தரக்குறைபாடு இருப்பதாக எச்சரித்தது. இதனைத் தொடர்ந்து, ஹிமாச்சல பிரதேச மருந்து கட்டுப்பாட்டு நிர்வாகம், சம்பந்தப்பட்ட 96 மருந்து தயாரிப்பு ஆலைகளை உடனடியாக மூடுமாறு உத்தரவிட்டுள்ளது.
எதில் குளறுபடி?
முக்கியமாக சளி, இருமல் மற்றும் உடல் வலி நிவாரண மருந்துகளில் இந்த தரக்குறைபாடுகள் கண்டறியப்பட்டுள்ளன. ஆய்வக சோதனைகளில், 'அம்ப்ராக்ஸால் ஹைட்ரோகுளோரைடு' (Ambroxol Hydrochloride) மற்றும் 'லெவோசால்புடமால்' (Levosalbutamol) போன்ற மருந்து உட்பொருட்களின் அளவுகளில் பெரும் குளறுபடி இருப்பது தெரியவந்துள்ளது. பல மருந்துகள் பாதுகாப்பு மற்றும் செயல்திறன் சோதனைகளில் (Assay and Dissolution) தோல்வியடைந்துள்ளன.
இந்திய பார்மா துறையில் தாக்கம்
இந்தியாவின் மருந்து உற்பத்தியில் ஹிமாச்சல பிரதேசம் ஒரு முக்கிய மையமாகும். பட்டி மற்றும் சோலன் பகுதிகளில் உள்ள 650-க்கும் மேற்பட்ட ஆலைகள், இந்தியாவின் மொத்த மருந்து தேவையில் சுமார் 35% பூர்த்தி செய்கின்றன. தற்போது எடுக்கப்பட்டுள்ள இந்த நடவடிக்கை, குறிப்பாக சிறிய மற்றும் நடுத்தர நிறுவனங்களை (SMEs) கடுமையாகப் பாதிக்கும் என்று எதிர்பார்க்கப்படுகிறது.
அடுத்தகட்ட நகர்வு என்ன?
இந்தியாவின் மருந்து ஏற்றுமதி மற்றும் உலகளாவிய நற்பெயரை பாதுகாக்க, அரசு 'குட் மேனுஃபேக்ச்சரிங் பிராக்டிசஸ்' (GMP) விதிகளை மிகவும் கடுமையாக்கி வருகிறது. இதன் விளைவாக, சிறிய நிறுவனங்கள் தரக்கட்டுப்பாட்டுக்கான அதிக செலவுகளைச் செய்ய வேண்டிய கட்டாயத்திற்கு தள்ளப்பட்டுள்ளன. இந்த அதிரடி நடவடிக்கை மருந்து விநியோகத்தில் தற்காலிக தட்டுப்பாட்டை ஏற்படுத்துமா அல்லது தரமான நிறுவனங்கள் மட்டுமே நீடிக்கும் நிலையை உருவாக்குமா என்பதைப் பொறுத்திருந்துதான் பார்க்க வேண்டும்.