ஆராய்ச்சி செலவை AI குறைப்பதால், உலகம் முழுவதும் புதிய மருந்து கண்டுபிடிப்புகள் அதிகரித்துள்ளன. இதனால், இந்தியாவின் CDMO நிறுவனங்களுக்கு Outsourcing வாய்ப்புகள் குவிகின்றன. Syngene, Divi's Lab மற்றும் Piramal Pharma போன்ற நிறுவனங்களின் வளர்ச்சி மற்றும் ரிஸ்க்குகளை அலசுவோம்.
மருந்து தயாரிப்பு துறையில் தற்போது மிகப்பெரிய மாற்றம் நடந்து வருகிறது. முன்னரெல்லாம் ஒரு மருந்தை கண்டுபிடிப்பதற்கு 10 ஆண்டுகளுக்கு மேலாகவும், பல பில்லியன் டாலர் செலவும் தேவைப்பட்டது. ஆனால் இப்போது, புரதங்களை மேப்பிங் செய்யவும், மருந்துகள் உடலில் எவ்வாறு செயல்படும் என்பதை கணிக்கவும் AI (Artificial Intelligence) தொழில்நுட்பம் பெரிதும் உதவுகிறது. இதனால், மருந்து கண்டுபிடிப்பு செலவு குறைந்து, புதிய மருந்துகளின் வரத்து அதிகரித்துள்ளது.
இந்திய நிறுவனங்களுக்கு செம்ம வாய்ப்பு
இந்த தொழில்நுட்ப வளர்ச்சியால், உலகளாவிய பார்மா நிறுவனங்கள் தங்களது ஆராய்ச்சி மற்றும் உற்பத்தி பணிகளை அவுட்சோர்சிங் செய்யத் தொடங்கியுள்ளன. இதில் இந்தியாவின் Syngene International, Divi's Laboratories, Laurus Labs மற்றும் Piramal Pharma ஆகிய நிறுவனங்கள் முன்னணியில் உள்ளன. இந்த நிறுவனங்கள் ஏற்கனவே அதிநவீன ஆய்வகங்கள் மற்றும் உற்பத்தி வசதிகளை உருவாக்கி, சிக்கலான வேதியியல் வேலைகளைக் கையாள்வதில் கைதேர்ந்தவர்களாக மாறியுள்ளன.
'China Plus One' உத்தி
இந்திய நிறுவனங்கள் வெறும் உற்பத்தி மட்டுமல்லாமல், சர்வதேச அளவில் மருந்து விநியோகச் சங்கிலியில் தங்களை நிலைநிறுத்திக் கொண்டுள்ளன. முக்கியமாக, உலக நாடுகள் சீனாவை மட்டுமே நம்பியிருக்காமல், மாற்று வழியை தேடுவதால் (China Plus One Strategy), இந்தியாவுக்கு அதிகப்படியான ஆர்டர்கள் வருகின்றன. இது சிறிய லெவலில் இருந்து, காம்ப்ளக்ஸ் மாலிகியூல்ஸ் (Complex Molecules) மற்றும் பெப்டைடுகள் தயாரிப்பு என உயர் ரக சேவைக்கு இந்திய நிறுவனங்களை உயர்த்தியுள்ளது.
கவனிக்க வேண்டிய சவால்கள் (Risks)
வளர்ச்சி ஒரு பக்கம் இருந்தாலும், முதலீட்டாளர்கள் சில விஷயங்களில் எச்சரிக்கையாக இருக்க வேண்டும். குறிப்பாக, அமெரிக்காவின் USFDA போன்ற உலகளாவிய அமைப்புகளின் கடுமையான விதிகளைப் பின்பற்றுவது மிகப்பெரிய சவால். ஏதேனும் ஒரு தணிக்கையில் குறைபாடுகள் கண்டறியப்பட்டால், அது உற்பத்தியை பாதிப்பதோடு பங்கு விலையையும் சரிக்கும். மேலும், சர்வதேச சந்தையில் நிலவும் கடும் விலை போட்டி மற்றும் மூலப்பொருள் விலை மாற்றங்களும் லாப வரம்பை (Profit Margin) பாதிக்கலாம்.
முதலீட்டாளர்கள் என்ன செய்ய வேண்டும்?
வெறுமனே வருவாய் வளர்ச்சியை மட்டும் பார்க்காமல், நிறுவனங்கள் புதிய வசதிகளை எவ்வளவு திறமையாகப் பயன்படுத்துகின்றன என்பதைக் கவனிக்க வேண்டும். அதிக லாபம் தரும் சிக்கலான கான்ட்ராக்ட்கள் எத்தனை கையில் உள்ளன என்பதே முக்கியம். காலாண்டு முடிவுகளின் போது, நிர்வாகம் சொல்லும் ரெகுலேட்டரி அப்டேட்கள் மற்றும் புதிய பிளாண்ட் கமிஷனிங் காலக்கெடுவை டிராக் செய்வது புத்திசாலித்தனமான முதலீடாக அமையும்.