2026-27 ஆண்டிற்கான எத்தனால் உற்பத்தியில் கரும்புச் சாறு மற்றும் சிரப் பயன்படுத்த மத்திய அரசு தடை விதித்துள்ளது. உணவுப் பாதுகாப்பு கருதி எடுக்கப்பட்டுள்ள இந்த முடிவால் சர்க்கரை ஆலை பங்குகள் சரிவை சந்தித்துள்ளன.
மத்திய அரசின் சமீபத்திய உத்தரவு சர்க்கரை மற்றும் எத்தனால் துறையில் பெரிய மாற்றத்தை ஏற்படுத்தியுள்ளது. நாட்டில் போதிய மழையில்லாத காரணத்தால், சர்க்கரை தட்டுப்பாட்டை தவிர்க்கவும், விலை உயர்வை கட்டுப்படுத்தவும் இந்த அதிரடி முடிவு எடுக்கப்பட்டுள்ளது. குறிப்பாக, 2026-27 ஆம் ஆண்டிற்கான டெண்டரில் கரும்புச் சாறு, சர்க்கரை சிரப் மற்றும் பி-ஹெவி மொலாசஸ் (B-heavy molasses) ஆகியவற்றைப் பயன்படுத்தத் தடை விதிக்கப்பட்டுள்ளது.
லாபத்தில் பாதிப்பு ஏற்படுமா?
எத்தனால் கலப்பு இலக்கை (20%) அரசு கைவிடவில்லை என்றாலும், புதிய கட்டுப்பாடுகள் நிறுவனங்களுக்கு சவாலாக மாறியுள்ளன. சோளம் சார்ந்த எத்தனால் கொள்முதல் விலையை ₹71.86-ல் இருந்து ₹68.86 ஆக அரசு குறைத்துள்ளது. இந்த விலை குறைப்பு மற்றும் சர்க்கரை மூலப்பொருட்களின் மீதான தடை, டிஸ்டிலரிகளின் செயல்பாட்டு லாபத்தை (Operating Margins) கடுமையாக பாதிக்கும் என எதிர்பார்க்கப்படுகிறது.
பங்குச்சந்தையில் தாக்கம்
இந்த அறிவிப்பு வெளியானதும், Balrampur Chini Mills மற்றும் EID Parry போன்ற முன்னணி நிறுவனங்களின் பங்குகள் சுமார் 6% வரை சரிந்தன. முதலீட்டாளர்கள் மத்தியில், இனி வரும் காலாண்டுகளில் நிறுவனங்கள் இந்த மாற்றத்தை எப்படி சமாளிக்கும் என்ற கவலை எழுந்துள்ளது. பல நிறுவனங்கள் சர்க்கரை சார்ந்த மூலப்பொருட்களைக் கொண்டே தங்கள் ஆலைகளை வடிவமைத்திருந்த நிலையில், இப்போது சோளம் மற்றும் அரிசி போன்ற தானியங்களுக்கு மாறுவது கூடுதல் செலவுகளை உருவாக்கும்.
அடுத்தடுத்த மாதங்களில் நிறுவனங்கள் வெளியிடும் வால்யூம் கைடன்ஸ் மற்றும் அவர்களின் புதிய செயல்பாட்டு வியூகங்கள் தான், இந்தத் துறையின் எதிர்காலத்தை தீர்மானிக்கும் முக்கிய அம்சங்களாக இருக்கும்.