உணவுப் பணவீக்கத்தைக் கட்டுப்படுத்த, 2026-27 எத்தனால் விநியோக ஆண்டில் கரும்புச் சாறு மற்றும் B-Heavy மொலாசஸ் பயன்பாட்டிற்கு மத்திய அரசு தடை விதித்துள்ளது. இனி OMCs தானியங்கள் மற்றும் C-Heavy மொலாசஸிற்கு முன்னுரிமை அளிக்க உள்ளன.
மத்திய அரசின் இந்த அதிரடி முடிவின்படி, 2026 நவம்பர் முதல் 2027 அக்டோபர் வரையிலான காலத்தில், சர்க்கரை ஆலைகள் கரும்புச் சாறு, சர்க்கரை பாகு மற்றும் B-Heavy மொலாசஸ் ஆகியவற்றிலிருந்து எத்தனாலைத் தயாரிக்க முடியாது. உள்நாட்டில் சர்க்கரை தட்டுப்பாடு ஏற்படக்கூடாது என்பதற்காகவும், சர்க்கரை விலையை நிலைப்படுத்தவுமே இந்த முடிவு எடுக்கப்பட்டுள்ளது.
அரசின் இலக்கு மற்றும் விலை நிர்ணயம்
அரசாங்கம் ஒட்டுமொத்தமாக 1,100 கோடி லிட்டர் எத்தனாலை கொள்முதல் செய்ய இலக்கு நிர்ணயித்துள்ளது. இனி C-Heavy மொலாசஸ், சேதமடைந்த தானியங்கள், உபரி அரிசி மற்றும் மக்காச்சோளம் ஆகியவற்றிலிருந்து மட்டுமே எத்தனால் பெறப்படும். இதன் கொள்முதல் விலைகள் பின்வருமாறு:
- C-Heavy மொலாசஸ்: லிட்டருக்கு ₹57.97
- தானியங்கள்: லிட்டருக்கு ₹60.32 முதல் ₹66.07 வரை
- மக்காச்சோளம்: கூடுதல் ஊக்கத்தொகையாக லிட்டருக்கு ₹2.79
முதலீட்டாளர்கள் கவனத்திற்கு
இதுவரை பல சர்க்கரை ஆலைகள் B-Heavy மொலாசஸை நம்பியே தங்கள் லாபத்தை அதிகரித்து வந்தன. இப்போது அது தடை செய்யப்பட்டுள்ளதால், அந்த நிறுவனங்கள் தங்கள் பிசினஸ் மாடலை மாற்ற வேண்டிய கட்டாயத்தில் உள்ளன. C-Heavy மொலாசஸ் குறைவான வருவாயையே தரும் என்பதால், ஆலைகள் தானியங்களைச் சுத்திகரிக்கும் புதிய கட்டமைப்புகளை உருவாக்க வேண்டியிருக்கும்.
இந்த மாற்றத்தால், ஏற்கனவே மல்டி-ஃபீட்ஸ்டாக் (Multi-feedstock) வசதி கொண்ட ஆலைகள் தப்பித்துக்கொள்ளும். ஆனால், அத்தகைய வசதி இல்லாத சிறிய ஆலைகளின் லாப வரம்பு (Profit Margins) கடுமையாகப் பாதிக்கப்படலாம். இனி வரும் காலாண்டு முடிவுகளில், நிறுவனங்கள் இந்த புதிய சூழலை எப்படி எதிர்கொள்ளப்போகின்றன என்பதை உன்னிப்பாகக் கவனிப்பது அவசியம்.