இந்தியாவின் மின்சார கட்டமைப்பை வலுப்படுத்த Green Energy Corridor-ன் மூன்றாம் கட்டத்திற்கு மத்திய அமைச்சரவை ஒப்புதல் அளித்துள்ளது. ₹1.86 லட்சம் கோடி பட்ஜெட்டில், 2033-க்குள் 135 GW புதுப்பிக்கத்தக்க எரிசக்தியை இணைப்பதே இதன் நோக்கம்.
மத்திய அமைச்சரவை Green Energy Corridor-ன் மூன்றாம் கட்டத்திற்கு (GEC-III) அதிகாரப்பூர்வமாக பச்சைக்கொடி காட்டியுள்ளது. இந்தியாவின் பவர் கிரிட் கட்டமைப்பில் உள்ள தடைகளை நீக்கி, தடையற்ற மின்சார விநியோகத்தை உறுதி செய்வதே இந்த பிரம்மாண்ட திட்டத்தின் இலக்கு. இதற்காக ₹1,86,405 கோடி ஒதுக்கப்பட்டுள்ளது.
முதலீட்டு விவரங்கள்
இந்தத் திட்டத்தில் ₹1,36,378 கோடி மாநிலங்களுக்கு இடையேயான மின் பரிமாற்றக் கட்டமைப்பை மேம்படுத்த ஒதுக்கப்பட்டுள்ளது. மேலும், ₹50,000 கோடி மதிப்பீட்டில் 50 GWh கொள்ளளவு கொண்ட பேட்டரி எனர்ஜி ஸ்டோரேஜ் சிஸ்டம் (BESS) அமைக்கப்படும். இது பகலில் கிடைக்கும் சூரிய மின்சக்தியைச் சேமித்து வைத்து, தேவைப்படும் நேரத்தில் பயன்படுத்த உதவும்.
மின்சாரக் கட்டணம் சாமானிய மக்களை பாதிக்காத வகையில் இருக்க, மத்திய அரசு ₹54,082 கோடி நிதி உதவியையும் வழங்குகிறது.
செயல்படுத்தும் முறை
புதிய திட்டங்களுக்கு Tariff-Based Competitive Bidding (TBCB) முறையும், பழைய கட்டமைப்புகளை மேம்படுத்த cost-plus ஒழுங்குமுறை கட்டமைப்பும் பின்பற்றப்படும். இது தனியார் மற்றும் பொதுத்துறை நிறுவனங்களுக்குப் போட்டியை ஏற்படுத்தி, தரமான கட்டுமானத்தை உறுதி செய்யும்.
முதலீட்டாளர்கள் கவனத்திற்கு
இந்தத் திட்டம் பிரம்மாண்டமாக இருந்தாலும், நிலம் கையகப்படுத்துதல் மற்றும் மாநில மட்டத்திலான உள்கட்டமைப்பு பணிகளில் உள்ள சவால்கள் தாமதங்களை ஏற்படுத்தலாம். FY 2032-33 இலக்கை அடைய, பேட்டரி ஸ்டோரேஜ் சப்ளை செயின் மற்றும் கட்டுமான பணிகள் எந்த வேகத்தில் நடைபெறுகிறது என்பதைப் பொறுத்தே இந்த திட்டத்தின் வெற்றி அமையும்.