சர்வதேச அளவில் டீசல் விலை திடீரென அதிகரித்துள்ளது. போர் பதற்றம் மற்றும் ஏற்றுமதி கட்டுப்பாடுகளால் விநியோகச் சங்கிலியில் பாதிப்பு ஏற்பட்டுள்ள நிலையில், இந்தியாவின் நிலை மற்றும் முதலீட்டாளர்கள் கவனிக்க வேண்டிய விஷயங்களை பார்ப்போம்.
சர்வதேச எரிசக்தி சந்தையில் டீசல் விலை தற்போது உச்சத்தை நோக்கிச் செல்கிறது. இதற்கு இரண்டு முக்கிய காரணங்கள்: ஒன்று, போரினால் ஆயில் ரிஃபைனரிகள் தாக்கப்படுவது, மற்றொன்று ரஷ்யா போன்ற முக்கிய நாடுகள் விதித்துள்ள ஏற்றுமதி தடைகள். கச்சா எண்ணெயை டீசலாக மாற்றும் கட்டமைப்பு பலத்த சேதமடைந்துள்ளதால், உலக சந்தையில் டீசல் தட்டுப்பாடு ஏற்பட்டுள்ளது. கச்சா எண்ணெய் மற்றும் டீசல் விலைக்கு இடையிலான வித்தியாசம், அதாவது 'Crack Spread' இதுவரை இல்லாத அளவிற்கு உயர்ந்துள்ளது.
உலக சந்தை ஏன் இவ்வளவு தத்தளிக்கிறது?
உலகம் முழுவதும் உள்ள ரிஃபைனரிகள் ஏற்கனவே முழு கொள்ளளவிலும் இயங்கி வருகின்றன. இதனால் திடீர் சப்ளை பாதிப்புகளை சமாளிக்க எந்தவித கூடுதல் உதிரிபாகங்களோ அல்லது கையிருப்புகளோ இல்லை. சமீபத்திய தாக்குதல்களால் தினமும் பல லட்சம் பேரல் டீசல் உற்பத்தி பாதிக்கப்பட்டுள்ளது. இது உலக நாடுகளிடையே கடும் போட்டிக்கும் விலை உயர்வுக்கும் வழிவகுத்துள்ளது.
இந்தியாவின் நிலை என்ன?
இந்த சூழலில் இந்தியா சற்று வித்தியாசமானது. இந்தியாவின் மொத்த ரிஃபைனரி திறன் சுமார் 258.1 மில்லியன் டன்கள். உள்நாட்டு தேவையை விட அதிக எரிபொருளை இந்தியா உற்பத்தி செய்கிறது. 2025-26 நிதியாண்டில் மட்டும் இந்தியா சுமார் 61.5 மில்லியன் டன்கள் பெட்ரோலியப் பொருட்களை ஏற்றுமதி செய்துள்ளது. இந்த உபரி உற்பத்தி இந்தியாவின் எரிசக்தி பாதுகாப்பை உறுதி செய்கிறது.
முதலீட்டாளர்கள் கவனிக்க வேண்டியது என்ன?
இந்தியா உபரி நாடாக இருந்தாலும், நாம் தொடர்ந்து கச்சா எண்ணெயை இறக்குமதி செய்கிறோம். உலகளவில் டீசல் தட்டுப்பாட்டால் கச்சா எண்ணெய் விலை உயர்ந்தால், அது இந்தியாவின் இறக்குமதி செலவை அதிகரித்து, உள்நாட்டில் பணவீக்கத்தை (Inflation) உண்டாக்கும்.
Reliance Industries போன்ற அதிக ரிஃபைனரி திறன் கொண்ட நிறுவனங்கள், உலக சந்தையில் அதிக மார்ஜின் ஈட்ட வாய்ப்புள்ளது. அதேசமயம், Indian Oil Corporation, Bharat Petroleum, மற்றும் Hindustan Petroleum போன்ற பொதுத்துறை நிறுவனங்கள் உள்நாட்டு விநியோகத்தில் கவனம் செலுத்துவதால், அரசாங்கத்தின் விலை நிர்ணயக் கொள்கைகள் இவர்களின் லாபத்தை தீர்மானிக்கும் முக்கிய காரணியாக இருக்கும். எனவே, இந்த நிறுவனங்களின் ரிஃபைனிங் மார்ஜின் மற்றும் அரசு எடுக்கும் எரிசக்தி கொள்கைகளை முதலீட்டாளர்கள் தொடர்ந்து கண்காணிக்க வேண்டும்.