உலக வங்கி தனது புதிய டிஜிட்டல் திட்டத்தை அறிவித்துள்ளது. வளர்ந்து வரும் நாடுகளில் 'Small AI' மற்றும் இணைய வசதிகளை மேம்படுத்துவதை நோக்கமாகக் கொண்ட இந்த திட்டம், இந்திய IT நிறுவனங்களுக்குப் புதிய சர்வதேச வாய்ப்புகளை உருவாக்கும் என எதிர்பார்க்கப்படுகிறது.
உலக வங்கி (World Bank) தனது முதல் விரிவான டிஜிட்டல் வியூகத்தை அதிகாரப்பூர்வமாகத் தொடங்கியுள்ளது. சியோலில் நடந்த உலகளாவிய AI மற்றும் டிஜிட்டல் உச்சிமாநாட்டில் அறிவிக்கப்பட்ட இந்த திட்டம், வளரும் நாடுகளில் நிலவும் இணைய வசதி மற்றும் செயற்கை நுண்ணறிவு இடைவெளியைக் குறைப்பதை நோக்கமாகக் கொண்டுள்ளது. அடுத்த 15 ஆண்டுகளில் வேலைவாய்ப்பு உருவாக்கத்தை விட, தொழிலாளர் எண்ணிக்கை அதிகமாக இருக்கும் என கணிக்கப்பட்டுள்ள நிலையில், இந்த முயற்சி முக்கியத்துவம் பெறுகிறது.
'Small AI' ஏன் முக்கியம்?
இந்த திட்டத்தின் மையப்பகுதியாக 'Small AI' எனப்படும் தொழில்நுட்பம் உள்ளது. அதாவது, பெரிய தரவு மையங்களுக்குப் பதில், விவசாயத்தில் பயிர் ஆரோக்கியத்தைக் கண்காணிப்பது, சிறு வணிகங்களுக்கான சரக்கு மேலாண்மை மற்றும் மருத்துவத்துறைக்குத் தேவையான உள்ளூர் தீர்வுகளை உருவாக்குவதுதான் இதன் நோக்கம். இதற்காக AI Infrastructure and Readiness Initiative என்ற திட்டத்தின் கீழ், தேவைக்கேற்ப பணம் செலுத்தும் (pay-as-you-go) முறையில் GPU வசதிகள் வழங்கப்பட உள்ளன.
இந்திய IT நிறுவனங்களுக்கு லாபமா?
இந்திய IT நிறுவனங்கள் ஏற்கனவே டிஜிட்டல் பொது உள்கட்டமைப்பை (DPI) உருவாக்குவதில் உலகத் தரம் வாய்ந்த அனுபவம் கொண்டவை. ஆதார் போன்ற அடையாள அமைப்புகள் மற்றும் டிஜிட்டல் பேமெண்ட் தளங்களை உருவாக்கிய இந்திய நிறுவனங்களுக்கு, ஆப்பிரிக்கா மற்றும் லத்தீன் அமெரிக்க நாடுகளில் செயல்படுத்தப்பட உள்ள இத்தகைய அரசு சார்ந்த டிஜிட்டல் மாற்றத் திட்டங்களில் பங்கேற்க நல்ல வாய்ப்புகள் உண்டு.
முதலீட்டாளர்கள் கவனத்திற்கு...
இது ஒரு நல்ல வாய்ப்பாகத் தெரிந்தாலும், சம்பந்தப்பட்ட நாடுகளில் உள்ள அரசியல் மற்றும் பொருளாதார நிலையற்ற தன்மை, மாறுபட்ட ஒழுங்குமுறை விதிகள் போன்ற சவால்களையும் முதலீட்டாளர்கள் கருத்தில் கொள்ள வேண்டும். டெண்டர்கள் மற்றும் உலக வங்கியின் நிதி ஒதுக்கீடு குறித்த அறிவிப்புகளைப் பொறுத்தே, இந்திய நிறுவனங்கள் எவ்வளவு பெரிய ஒப்பந்தங்களைப் பெறும் என்பது தெரியவரும்.