மாநில வரி வருவாய்: ₹2.06 லட்சம் கோடியுடன் முதலிடத்தில் உத்தரப்பிரதேசம்!

இந்த நிதி ஆண்டின் முதல் ஐந்து மாதங்களில், ₹2.06 லட்சம் கோடி வரி வருவாயைப் பெற்று உத்தரப்பிரதேசம் இந்தியாவின் டாப் இடத்தைப் பிடித்துள்ளது. இது கடந்த ஆண்டை விட 12% உயர்வாகும். Comptroller & Auditor General வெளியிட்ட தரவுகளின்படி, இந்த மாநிலத்தில் மட்டும் 22 லட்சத்திற்கும் அதிகமான பதிவு செய்யப்பட்ட GST வரி செலுத்துவோர் உள்ளனர்.

வரி வசூலில் உத்தரப்பிரதேசத்திற்கு அடுத்தபடியாக கர்நாடகா மற்றும் தமிழ்நாடு மாநிலங்கள் உள்ளன. அதே சமயம், கேரள மாநிலம் 22% என்ற அதிரடி வளர்ச்சியுடன் அனைவரையும் திரும்பிப் பார்க்க வைத்துள்ளது.

வளர்ச்சிக்கு என்ன காரணம்?

அனைத்து மாநிலங்களிலும் SGST (State Goods and Services Tax) வருவாய்தான் முக்கிய பங்காற்றுகிறது. உத்தரப்பிரதேசம் மட்டும் ஏப்ரல் - ஜூலை மாதங்களுக்குள் ₹73,000 கோடி SGST வருவாயைப் பெற்றுள்ளது, இது கடந்த ஆண்டு இதே காலகட்டத்தில் ₹66,000 கோடியாக இருந்தது குறிப்பிடத்தக்கது.

உள்கட்டமைப்பு மற்றும் தனியார் முதலீடு

வரி வருவாய் ஒருபுறம் இருந்தாலும், உள்கட்டமைப்பு பணிகளில் குஜராத் முன்னிலை வகிக்கிறது. அந்த மாநிலம் முதல் ஐந்து மாதங்களில் ₹29,600 கோடி செலவிட்டுள்ளது. இதே காலகட்டத்தில் உத்தரப்பிரதேசம் ₹21,000 கோடியும், கர்நாடகா ₹15,600 கோடியும் செலவிட்டுள்ளன.

15-வது நிதிக்குழுவின் தலைவர் என்.கே. சிங், மாநிலங்கள் இனி சொத்து வரி மற்றும் கனிம வளங்கள் மூலம் கூடுதல் வருவாய் ஈட்ட வேண்டும் என வலியுறுத்தியுள்ளார். அரசு பட்ஜெட்டுகளை மட்டும் நம்பியிருக்காமல், பெரிய அளவிலான திட்டங்களுக்குத் தனியார் துறையின் பங்களிப்பை (Private Sector Participation) அதிகரிக்க வேண்டும் என்பதே பொருளாதார விவகாரத் துறை செயலாளர் அனுராதா தாக்கூர் முன்வைக்கும் முக்கிய ஆலோசனையாகும்.