இந்திய ரிசர்வ் வங்கி (RBI) பிளாஸ்டிக் நோட்டுகளை அறிமுகம் செய்யும் முயற்சியில் இறங்கியுள்ளது. இதற்கான ஒப்பந்தத்தில் Uflex மற்றும் Spectra Systems நிறுவனம் இணைந்து விண்ணப்பித்துள்ளன. இந்த சோதனை முயற்சியின் முக்கிய அம்சங்கள் மற்றும் சவால்கள் என்ன?
இந்திய கரன்சி மேனேஜ்மென்ட் துறையில் பெரிய மாற்றத்தை கொண்டுவர ரிசர்வ் வங்கி (RBI) திட்டமிட்டுள்ளது. பாரம்பரிய காகித நோட்டுகளுக்கு பதிலாக பிளாஸ்டிக் (Polymer) நோட்டுகளை அறிமுகப்படுத்த RBI களமிறங்கியுள்ளது. இதற்காக ₹10 மற்றும் ₹20 ரூபாய் நோட்டுகளில் சோதனை முயற்சியை (Pilot project) மேற்கொள்ளத் திட்டமிட்டுள்ளது.
ஒப்பந்தத்தின் முக்கிய விவரங்கள்
பாரதிய ரிசர்வ் வங்கி நோட்டு முத்ரன் பிரைவேட் லிமிடெட் இந்த ஒப்பந்தத்தை ஒருங்கிணைக்கிறது. இதன்படி சுமார் 68,000 ரீம்கள் BOPP (Biaxially Oriented Polypropylene) சப்ஸ்ட்ரேட் தேவைப்படுகிறது. இதன் மூலம் சுமார் 100 கோடி எண்ணிக்கையிலான ₹10 மற்றும் ₹20 நோட்டுகளை அச்சிட இலக்கு நிர்ணயிக்கப்பட்டுள்ளது.
கடும் போட்டி
இந்த மெகா ஒப்பந்தத்தை கைப்பற்ற Uflex நிறுவனம் அமெரிக்காவைச் சேர்ந்த Spectra Systems உடன் கைகோர்த்துள்ளது. எனினும், இந்த போட்டியில் Cosmo First (De La Rue உடன்), Q&T Hi-Tech Polymer, Pigments and Allieds போன்ற நிறுவனங்கள் களத்தில் உள்ளன. சர்வதேச அளவில் வலுவான நிலையில் உள்ள CCL Secure நிறுவனமும் இதில் ஈடுபட்டுள்ளது, எனவே போட்டி கடுமையாக இருக்கும்.
முதலீட்டாளர்கள் கவனத்திற்கு
இந்த திட்டம் ஆரம்ப கட்ட சோதனை முயற்சியில் மட்டுமே உள்ளது என்பதை கவனத்தில் கொள்ள வேண்டும். கடந்த காலங்களில் பிளாஸ்டிக் நோட்டு அறிமுகம் குறித்த முயற்சிகள் தொழில்நுட்ப சிக்கல்களால் கைவிடப்பட்டன. மேலும், BOPP போன்ற மூலப்பொருட்களின் விலை ஏற்ற இறக்கம் Uflex போன்ற நிறுவனங்களின் லாபத்தை பாதிக்கலாம். இந்த தொழில்நுட்பம் இந்தியாவின் பணப்புழக்கத்திற்கு ஏற்றதா என்பதை பொறுத்தே அடுத்தகட்ட ஒப்பந்தங்கள் அமையும். எனவே, இது நீண்ட கால வருவாய்க்கு உதவுமா என்பது தொழில்நுட்ப மதிப்பீட்டிற்கு பிறகே தெரியவரும்.