US விசா கட்டுப்பாடுகள் இந்தியாவை இலக்காகக் கொண்டவை அல்ல என்று அமெரிக்க வெளியுறவுத்துறை செயலர் Marco Rubio கூறியுள்ளார். இருப்பினும், விசா புதுப்பித்தல் விதிமுறைகள் மற்றும் புதிய கட்டண உயர்வுகள் இந்திய IT நிறுவனங்களின் லாபத்தை பாதிக்கும் அச்சத்தை ஏற்படுத்தியுள்ளது.
அமெரிக்காவின் புதிய குடிவரவு மாற்றங்கள் குறித்து விளக்கம் அளித்துள்ள அமெரிக்க வெளியுறவுத்துறை செயலர் Marco Rubio, இந்த விசா கட்டுப்பாடுகள் குறிப்பிட்ட நாடுகளை குறிவைக்கவில்லை என்றும், நிர்வாக ரீதியான மாற்றங்களே என்றும் கூறியுள்ளார். இருப்பினும், அமெரிக்காவிற்கு அதிக அளவில் பணியாளர்களை அனுப்பும் இந்திய IT துறையில் இது பெரும் தாக்கத்தை ஏற்படுத்தியுள்ளது.
விசா புதுப்பித்தலில் சிக்கல்
முக்கியமாக, விசா புதுப்பித்தல் நடைமுறையில் இருந்த 'Renewal Deference' கொள்கை நீக்கப்பட்டுள்ளது. இதற்கு முன்பு எளிமையாக இருந்த புதுப்பித்தல் செயல்முறை, தற்போது கடுமையான பரிசோதனைகளுக்கு உட்படுத்தப்படுகிறது. இது திட்டப் பணிகளில் உள்ள பணியாளர்களின் தொடர்ச்சியில் நிச்சயமற்ற தன்மையை உருவாக்கியுள்ளது. மேலும், சில விசா வகைகளுக்கு USD 1,00,000 வரை கட்டணம் வசூலிக்கப்படுவதும், செப்டம்பர் 2027 வரை சில விசாக்கள் முடக்கப்பட்டிருப்பதும் நிறுவனங்களுக்கு கூடுதல் நிதி சுமையை தந்துள்ளன.
லாபத்தில் பாதிப்பு ஏற்படுமா?
புதிய விசா லாட்டரி முறையானது அதிக சம்பளம் பெறும் பணியாளர்களுக்கு முன்னுரிமை அளிப்பதால், நிறுவனங்கள் பணியாளர்களின் ஊதியத்தை உயர்த்த வேண்டிய கட்டாயத்தில் உள்ளன. அண்மையில் ஆட்குறைப்பு செய்த நிறுவனங்களுக்கு அதிகக் கண்காணிப்பு இருக்கும் என்ற அறிவிப்பு, பணியமர்த்தல் சூழலை மேலும் சிக்கலாக்கியுள்ளது.
தற்போது இந்திய IT நிறுவனங்கள் உள்ளூர் பணியாளர்களை (Local Talent) பணியமர்த்தும் முயற்சியில் ஈடுபட்டுள்ளன, ஆனால் இதுவும் நிறுவனங்களுக்கு அதிக செலவை ஏற்படுத்துகிறது. இந்த கூடுதல் செலவுகளை வாடிக்கையாளர்கள் மீது சுமத்த முடியுமா அல்லது நிறுவனங்களின் லாப வரம்பு (Margin) குறையுமா என்பதுதான் முதலீட்டாளர்களின் தற்போதைய பெரிய கேள்வி. வரவிருக்கும் காலாண்டு முடிவுகளின் போது, நிர்வாகங்கள் இது குறித்து என்ன விளக்கம் அளிக்கின்றன என்பதை கவனிக்க வேண்டியது அவசியம்.