அமெரிக்காவின் **10-year Treasury yield** மீண்டும் **4.8%** நிலையை எட்டியுள்ளது. இது சர்வதேச சந்தையிலும், குறிப்பாக AI டெக் நிறுவனங்களிலும் கடும் அழுத்தத்தை ஏற்படுத்தியுள்ளது. அதிக வட்டிச் சுமையால் இந்த நிறுவனங்களின் வேல்யூவேஷன் சரியும் அபாயம் எழுந்துள்ளது.
உலக முதலீட்டுச் சந்தையில் தற்போது ஒரு பெரிய மாற்றத்திற்கான அறிகுறிகள் தென்படுகின்றன. அமெரிக்காவின் 10-year Treasury yield எனப்படும் அரசுப் பத்திர லாப விகிதம் 4.8% என்ற முக்கிய நிலையை எட்டியுள்ளது. சர்வதேச அளவில் கடன் வாங்கும் செலவுக்கான அளவுகோலாக இது இருப்பதால், இதன் உயர்வு டெக் துறை நிறுவனங்களுக்குச் சிக்கலை ஏற்படுத்தியுள்ளது.
டெக் துறை ஏன் கவலைப்பட வேண்டும்?
வளர்ந்து வரும் டெக் நிறுவனங்கள் பெரும்பாலும் அவற்றின் எதிர்கால லாபத்தை நம்பியே இயங்குகின்றன. ஆனால், வட்டி விகிதம் உயரும்போது, கையில் இருக்கும் பணத்தின் மதிப்பு மாறுகிறது. குறிப்பாக, செயற்கை நுண்ணறிவு (AI) கட்டமைப்புகளை உருவாக்க பில்லியன் டாலர்களைக் கடனாகப் பெற்று முதலீடு செய்யும் இந்த நிறுவனங்களுக்கு, வட்டிச் சுமை லாபத்தைக் குறைக்கும் காரணியாக மாறியுள்ளது.
அமெரிக்க நிதிநிலை மற்றும் சிக்கல்கள்
அமெரிக்காவின் நிதிப் பற்றாக்குறை (Fiscal Deficit) தற்போது ஜிடிபியில் 6% ஆக உள்ளது. மேலும் அந்நாட்டின் மொத்தக் கடன் $40 டிரில்லியன் என்ற உச்சத்தைத் தொட்டுள்ளது. இதனால் புதிய பத்திரங்களை வெளியிட வேண்டிய கட்டாயத்தில் அரசு உள்ளது, இது பத்திர லாப விகிதங்களை மேலும் உயர்த்துகிறது. பாதுகாப்பான அமெரிக்க அரசுப் பத்திரங்களே 5% வருமானம் தரும்போது, அதிக ரிஸ்க் உள்ள பங்குகளில் முதலீட்டாளர்கள் ஏன் பணத்தை முதலீடு செய்ய வேண்டும் என்ற கேள்வி எழுந்துள்ளது.
இந்திய முதலீட்டாளர்களுக்கு என்ன பாதிப்பு?
இந்தியாவிலிருந்து வெளிநாட்டு டெக் பங்குகளில் அதிக முதலீடு செய்திருப்பவர்களுக்கு இந்த மாற்றம் ஒரு எச்சரிக்கை மணி. உலகளாவிய சந்தைகளில் ஏற்படும் ஒரு சிறிய சரிவு கூட, உலக டெக் பங்குகளைப் பாதித்து, அதன் தாக்கம் இந்தியப் பங்குச் சந்தையிலும் எதிரொலிக்க வாய்ப்புள்ளது. குறிப்பாக AI முதலீடுகள் உண்மையான லாபமாக மாறுகிறதா என்பதை நிறுவனங்கள் நிரூபிக்க வேண்டிய கட்டாயத்தில் உள்ளன. இனி வரும் நாட்களில் டெக் நிறுவனங்கள் வெளியிடும் கடனைத் திருப்பிச் செலுத்தும் திறன் (Debt Servicing) குறித்த அறிவிப்புகளை முதலீட்டாளர்கள் கூர்ந்து கவனிக்க வேண்டும்.