ஸ்பெயின் அரசு புதிய வீட்டு வசதி சட்டங்களை கொண்டுவரத் திட்டமிட்டுள்ளது. நாடு முழுவதும் நிலவும் போராட்டங்களால், 2028-ம் ஆண்டு வரை ரியல் எஸ்டேட் ஃபண்டுகள் சொத்துக்களை வாங்கி குவிக்க தடை விதிக்கப்பட உள்ளது.
ஸ்பெயினில் அதிகரித்து வரும் வீட்டின் விலை மற்றும் பொதுமக்களின் போராட்டத்தைக் கட்டுப்படுத்த, அந்நாட்டு அரசு அவசரக்கால வீட்டு வசதி சீர்திருத்தங்களை அறிமுகப்படுத்தியுள்ளது. இதில் மிக முக்கியமான அம்சம், முதலீட்டு நிறுவனங்கள் (Investment Funds) லாபத்திற்காக சொத்துக்களை வாங்கி குவிப்பதற்கு 2028 வரை தடை விதிக்கப்படுவதுதான். இதோடு மட்டுமல்லாமல், வீடுகளை காலி செய்ய வைக்கும் நடவடிக்கைகளுக்கு 2030 வரை கூடுதல் பாதுகாப்பு வழங்கவும் அரசு திட்டமிட்டுள்ளது.
முதலீட்டாளர்களுக்கு சிக்கலா?
பெரிய முதலீட்டு நிறுவனங்கள் குறுகிய கால லாபத்திற்காக வீடுகளை வாங்குவதுதான் விலை உயர்வுக்கு காரணம் என அரசு கருதுகிறது. இந்தத் தடையால் ஸ்பெயின் ரியல் எஸ்டேட் சந்தைக்கு வரும் முதலீடுகள் (Capital Flow) பாதிக்கப்படலாம் என அஞ்சப்படுகிறது. இந்த ஃபண்டுகள் எத்தகைய வகைப்பாட்டில் வரும், அவற்றுக்கு எவ்வளவு வரி விதிக்கப்படும் என்பது இன்னும் தெளிவாகத் தெரியவில்லை.
நாடாளுமன்றத்தில் கடும் சவால்
பிரதமர் Pedro Sánchez தலைமையிலான சிறுபான்மை அரசுக்கு 350 இடங்களில் 152 இடங்கள் மட்டுமே உள்ளன. இதனால் வெள்ளிக்கிழமை நடக்கவிருக்கும் நாடாளுமன்ற வாக்கெடுப்பில் வெற்றி பெறுவது அவருக்கு மிகப்பெரிய சவாலாக இருக்கும். ஏற்கனவே கடந்த ஜூலை மாதம் இதே போன்ற சட்ட மசோதா தோல்வியடைந்தது குறிப்பிடத்தக்கது.
தற்போது, இறுதி சட்ட வடிவம் எப்படி இருக்கும் என்பதைப் பொறுத்தே ரியல் எஸ்டேட் டெவலப்பர்கள் மற்றும் முதலீட்டாளர்களின் எதிர்காலம் தீர்மானிக்கப்படும்.