இந்தியாவில் தங்களின் வர்த்தகத்தை விரிவுபடுத்தும் நோக்கில், ரஷ்ய நிறுவனங்கள் நவி மும்பையில் நிரந்தரக் கண்காட்சி கூடத்தைத் தொடங்கியுள்ளன. ஆற்றல் மற்றும் பாதுகாப்புத் துறையைத் தாண்டி, நுகர்வோர் பொருட்கள் மற்றும் தொழில்நுட்பத் துறையில் கால்பதிக்க ரஷ்ய ஏற்றுமதி மையம் (Russian Export Centre) இந்த முயற்சியை முன்னெடுத்துள்ளது.
நேரடி விற்பனை மற்றும் டிஜிட்டல் ஊடுருவல்
இதுவரை தற்காலிகக் கண்காட்சிகளை மட்டுமே நம்பியிருந்த ரஷ்ய நிறுவனங்கள், இப்போது நவி மும்பையில் 'Made in Russia' என்ற பெயரில் நிரந்தரக் கண்காட்சி கூடத்தைத் தொடங்கியுள்ளன. இதன் மூலம் இந்திய இறக்குமதியாளர்கள் ரஷ்யப் பொருட்களை ஆண்டு முழுவதும் நேரடியாகப் பார்வையிட்டு ஆர்டர் செய்ய முடியும்.
இதோடு டிஜிட்டல் ரீதியாகவும் ரஷ்யா தீவிரமாகச் செயல்படுகிறது. Amazon India, Nykaa, மற்றும் Tira போன்ற தளங்களில் ரஷ்யத் தயாரிப்புகளை விற்பனை செய்யத் தொடங்கியுள்ளனர். 2025-ம் ஆண்டில் மட்டும் REC குரூப் ஆதரவுடன் நடந்த ஏற்றுமதி வர்த்தகம் 103.3 பில்லியன் ரூபிள்களைத் தாண்டியுள்ளது என்பது குறிப்பிடத்தக்கது.
உணவு மற்றும் தொழில்நுட்பத் துறையில் ஆர்வம்
Makfa மற்றும் Miratorg போன்ற முன்னணி ரஷ்ய உணவு நிறுவனங்கள் இந்திய சப்ளை செயினில் இணையத் திட்டமிட்டுள்ளன. வெறும் பொருட்களை விற்பதுடன் மட்டும் நிறுத்திக்கொள்ளாமல், ரோபாட்டிக்ஸ் மற்றும் டிஜிட்டல் தொழில்நுட்பத் துறைகளிலும் இந்திய நிறுவனங்களுடன் கூட்டு சேர ரஷ்யா முனைப்பு காட்டி வருகிறது.
உள்நாட்டு நிறுவனங்களுக்கு சவால்?
இந்த திடீர் வர்த்தக விரிவாக்கம், இந்தியாவின் உணவுப் பதப்படுத்துதல், அழகுசாதனப் பொருட்கள் மற்றும் தொழில்நுட்பத் துறையில் உள்ளூர் நிறுவனங்களுக்குப் புதிய போட்டியை உருவாக்கலாம். இந்திய சந்தையின் விலை உணர்திறன் மற்றும் தரக்கட்டுப்பாடுகளுக்கு ஏற்ப ரஷ்ய நிறுவனங்கள் தங்களை மாற்றிக்கொள்ளுமா என்பதைப் பொறுத்திருந்துதான் பார்க்க வேண்டும்.