சந்தை சரிவுக்கு வரி மாற்றங்கள் தான் காரணம் என முதலீட்டாளர்கள் நினைக்கும் நிலையில், அதற்கும் மேலாக நிறுவனங்களின் மிக அதிகப்படியான மதிப்பீடு (Valuation) தான் இந்த வீழ்ச்சிக்கு முதன்மைக் காரணம் என தரவுகள் காட்டுகின்றன.
சமீபத்திய இந்திய பங்குச்சந்தை சரிவு குறித்து முதலீட்டாளர்களுக்கும் அரசுக்கும் இடையே ஒரு பெரிய விவாதம் நடந்து வருகிறது. பலர் இதனை வரி விதிப்பு மாற்றங்களால் (STT மற்றும் LTCG) ஏற்பட்ட வீழ்ச்சி என்று கூறுகின்றனர். ஆனால், ஆழமான சந்தை ஆய்வுப்படி இது அரசின் கொள்கையை விட, நிறுவனங்களின் வரலாற்று ரீதியான அதிகப்படியான மதிப்பீட்டு விலையே (Overvaluation) முக்கிய காரணம் என்பது புரிகிறது.
P/E விகிதம் சொல்லும் பாடம்
செப்டம்பர் 2024-ல் சந்தை உச்சத்தில் இருந்தபோது, Nifty 50 இன் P/E விகிதம் 24 ஆக இருந்தது. சில நிறுவனங்கள் அவற்றின் லாபத்தை விட 60 முதல் 200 மடங்கு அதிக விலையில் வர்த்தகமானது. இவ்வளவு உயர்ந்த விலையில் முதலீடு செய்யும்போது, அந்நிறுவனங்கள் மிகச் சிறந்த வளர்ச்சியைத் தொடர்ந்து காட்ட வேண்டும். சிறிய சுணக்கம் ஏற்பட்டால் கூட, பங்கின் விலை கடுமையாக வீழ்ச்சியடையும்.
ஏன் இந்த சரிவு?
Trent, Tata Consumer Products மற்றும் Asian Paints போன்ற முன்னனி நிறுவனங்களின் பங்குகள் 20% முதல் 43% வரை சரிந்தன. முதலீட்டாளர்கள் எதிர்பார்த்த வளர்ச்சி கிடைக்காததால், சந்தை தனது போக்கை மாற்றிக்கொண்டது. இது வரியினால் ஏற்பட்ட பீதி அல்ல, மாறாக விலையையும் வளர்ச்சியையும் சரிசெய்து கொள்ளும் ஒரு இயற்கை மாற்றம்.
FII வெளியேற்றம் எதனால்?
கடந்த இரண்டு ஆண்டுகளில் அந்நிய நிறுவன முதலீட்டாளர்கள் (FIIs) இந்திய சந்தையிலிருந்து சுமார் ₹5.7 லட்சம் கோடி முதலீட்டை திரும்பப் பெற்றுள்ளனர். இதற்கு வரி காரணம் என்று சொல்லப்பட்டாலும், உலகளாவிய வட்டி விகித உயர்வு மற்றும் இந்திய பங்குகளின் விலை மிக அதிகமாக இருந்ததுமே முக்கிய காரணம். பாதுகாப்பான முதலீடுகளை உலக முதலீட்டாளர்கள் தேடுவதே இப்போதைய ட்ரெண்ட்.
அடுத்த கட்டம் என்ன?
Nifty Smallcap 250 மற்றும் Midcap 150 குறியீடுகளில் உள்ள நிறுவனங்கள், வளர்ச்சியை விட டிவிடெண்ட் மற்றும் ஷேர் பைபேக் (Buyback) போன்ற குறுகிய கால பலன்களில் கவனம் செலுத்துகின்றன. எனவே, இனி வரும் காலங்களில் வரி மாற்றங்களை விட, நிறுவனங்களின் செயல்பாட்டுத் திறன் (Operational Efficiency) மற்றும் லாப அறிக்கைகளை மட்டும் கவனத்தில் கொண்டு முதலீடு செய்வது புத்திசாலித்தனம்.