இந்திய உற்பத்தி துறையில் (Manufacturing Sector) ஒரு பெரிய இடைவெளி இருப்பதை புதிய தரவுகள் காட்டுகின்றன. பெரிய நிறுவனங்கள் ஒட்டுமொத்த சந்தையையும் ஆதிக்கம் செலுத்தும் நிலையில், சிறிய தொழிற்சாலைகள் கடன் சுமையிலும், உற்பத்தி வளர்ச்சியிலும் கடும் நெருக்கடியை சந்தித்து வருகின்றன.
சமீபத்திய 'Annual Survey of Industries' தரவுகள், இந்தியாவின் உற்பத்தித் துறையில் நிலவும் கட்டமைப்பை அப்பட்டமாக வெளிச்சம் போட்டு காட்டியுள்ளன. 200-க்கும் மேற்பட்ட தொழிலாளர்களைக் கொண்ட பெரிய தொழிற்சாலைகள் மொத்த எண்ணிக்கையில் வெறும் 10.4% மட்டுமே. ஆனால், நாட்டின் மொத்த உற்பத்தி மதிப்பில் இவைகள் மட்டும் 72% பங்களிப்பை வழங்குகின்றன. இதுவே இந்திய தொழிற்துறையின் உண்மையான முகமாக உள்ளது.
சிறிய நிறுவனங்களின் பரிதாப நிலை
மறுபுறம், 10 அல்லது அதற்கும் குறைவான தொழிலாளர்களைக் கொண்ட நுண்-நிறுவனங்கள் (Micro-units) மொத்த தொழிற்சாலைகளில் 36%-ஆக உள்ளன. ஆனால், இவற்றின் உற்பத்தி பங்களிப்பு வெறும் 2% மட்டுமே. அதேபோல், 50 தொழிலாளர்கள் வரை கொண்ட சிறிய நிறுவனங்கள் 71% அளவுக்கு இருந்தாலும், மதிப்பின் அடிப்படையில் வெறும் 10% பங்களிப்பை மட்டுமே தருகின்றன.
கடன் சுமை ஒரு முக்கிய தடையாக...
சிறிய நிறுவனங்கள் எதிர்கொள்ளும் மிகப்பெரிய சவால் 'டெபிட்' (Debt) தான். நுண்-நிறுவனங்களின் கடன்-மதிப்பு விகிதம் (Loan-to-value ratio) 85% ஆக உள்ளது. இது பெரிய நிறுவனங்களில் 39% ஆக மட்டுமே இருப்பது குறிப்பிடத்தக்கது. அதிக கடன் சுமையால், இந்த சிறிய நிறுவனங்களால் புதிய மெஷினரி வாங்கவோ அல்லது ஊழியர்களுக்கு பயிற்சி அளிக்கவோ முடியாமல், வளர்ச்சியில் பின்தங்கி கிடக்கின்றன.
2024-25 நிதியாண்டின் போக்கு
இத்தனை சவால்களுக்கு மத்தியிலும், ஒட்டுமொத்த உற்பத்தித் துறை 7.81% வளர்ச்சியையும், வேலைவாய்ப்பு 7.19% வளர்ச்சியையும் கண்டுள்ளது. இருப்பினும், கண்டுபிடிப்புகள் மற்றும் ஆராய்ச்சியில் (R&D) 2.7% தொழிற்சாலைகள் மட்டுமே ஈடுபட்டுள்ளன. இதில் பெரும்பான்மையானவை பெரிய நிறுவனங்கள் என்பது குறிப்பிடத்தக்கது. முதலீட்டாளர்கள் கவனிக்க வேண்டிய விஷயம் என்னவென்றால், அரசாங்கத்தின் புதிய பாலிசி முடிவுகள் மற்றும் கிரெடிட் சப்போர்ட் இந்த இடைவெளியை எவ்வாறு சரிசெய்யப்போகிறது என்பதுதான் வரும் காலத்தின் முக்கிய அப்டேட்டாக இருக்கும்.