ஜூலை 31 ஆம் தேதி வருமான வரி ரிட்டர்ன்ஸ் (ITR) தாக்கல் செய்வதற்கான கடைசி நாள் நெருங்குகிறது. தவறான ஃபைலிங்கால் நோட்டீஸ் மற்றும் ரீஃபண்ட் தாமதத்தைத் தவிர்க்க, உங்கள் தகவல்களைச் சரிபார்த்து, வருமானத்தை AIS உடன் ஒப்பிட்டு, இ-வெரிஃபிகேஷன் செய்வதை உறுதிசெய்யுங்கள்.
சரியான ITR படிவத்தைத் தேர்ந்தெடுப்பது எப்படி?
வருமான வரி தாக்கல் செய்வதற்கான கடைசி நாள் நெருங்குகிறது. பலரும் அவசரத்தில் சில முக்கிய விஷயங்களை கவனிக்கத் தவறிவிடுகின்றனர். இதில் சிறிய தவறு நடந்தால்கூட, அது வருமான வரி நோட்டீஸ் வரவோ, ரீஃபண்ட் தாமதமாகவோ வழிவகுக்கும். எனவே, சில முக்கிய விஷயங்களை மனதில் கொள்ள வேண்டும்.
முதலில், உங்களுக்கான சரியான ITR படிவத்தைத் தேர்ந்தெடுப்பது மிக முக்கியம். உங்கள் வருமான ஆதாரங்கள், குடியிருப்பு நிலை ஆகியவற்றின் அடிப்படையில் சரியான படிவத்தைத் தேர்ந்தெடுக்கவில்லை என்றால், உங்கள் ரிட்டர்ன்ஸ் நிராகரிக்கப்படலாம் அல்லது 'defective' என அறிவிக்கப்படலாம்.
அடுத்து, உங்கள் தனிப்பட்ட விவரங்களான PAN, ஆதார் எண், வங்கி கணக்கு விவரங்கள் போன்றவற்றை இரண்டு முறை சரிபார்க்க வேண்டும். குறிப்பாக, வங்கி கணக்கு விவரங்களில் எந்த தவறும் இருக்கக் கூடாது. அப்போதுதான் ரீஃபண்ட் தொகையை உங்கள் கணக்கில் சரியாக வரவு வைக்க முடியும். உங்கள் வங்கி கணக்கை வருமான வரி இணையதளத்தில் (Income Tax Portal) 'pre-validated' செய்துள்ளீர்களா என்பதையும் உறுதிப்படுத்திக் கொள்ளுங்கள்.
AIS மற்றும் ஃபார்ம் 26AS உடன் ஒப்பிடுதல்
நீங்கள் ரிட்டர்ன்ஸில் காட்டியுள்ள வருமானத்திற்கும், வருமான வரித்துறையிடம் உள்ள தகவல்களுக்கும் இடையே முரண்பாடுகள் இருந்தால், உங்களுக்கு நோட்டீஸ் வர வாய்ப்புள்ளது. இதைத் தவிர்க்க, உங்கள் வருமானத்தை, வருடாந்திர தகவல் அறிக்கை (Annual Information Statement - AIS), Taxpayer Information Summary (TIS) மற்றும் ஃபார்ம் 26AS உடன் கவனமாக ஒப்பிட்டுப் பார்க்க வேண்டும்.
வங்கி வட்டி வருமானம், டிவிடெண்ட், பங்குகள் விற்பனை, சொத்து விற்பனை போன்ற அனைத்து நிதிப் பரிவர்த்தனைகளின் விவரங்களும் AIS-ல் இருக்கும். நீங்கள் வட்டி வருமானம் அல்லது மூலதன ஆதாயங்களை (Capital Gains) குறிப்பிட மறந்துவிட்டால், இந்த முரண்பாடு ஏற்படலாம்.
மேலும், ஃபார்ம் 26AS-ல் உள்ள TDS (Tax Deducted at Source) விவரங்கள் அனைத்தும் உங்கள் ரிட்டர்ன்ஸில் சரியாக உள்ளதா என்பதையும் சரிபார்க்க வேண்டும். ஏதேனும் முரண்பாடுகள் இருந்தால், வரித்துறை விளக்கம் கேட்கவோ அல்லது கூடுதல் வரி செலுத்தவோ கோரி நோட்டீஸ் அனுப்பலாம்.
இ-வெரிஃபிகேஷன் செயல்முறையை நிறைவு செய்தல்
பலர், ரிட்டர்ன்ஸ் தாக்கல் செய்துவிட்டாலே வேலை முடிந்துவிட்டதாக நினைக்கிறார்கள். ஆனால், இது தவறு. நீங்கள் ரிட்டர்ன்ஸை சமர்ப்பித்த பிறகு, அதை இ-வெரிஃபிகேஷன் (e-verification) செய்வது மிக அவசியம். ஆதார் OTP, நெட் பேங்கிங் அல்லது பிற மின்னணு முறைகள் மூலம் இதை எளிதாகச் செய்யலாம்.
குறிப்பிட்ட காலக்கெடுவுக்குள் இ-வெரிஃபிகேஷன் செய்யாவிட்டால், நீங்கள் ரிட்டர்ன்ஸ் தாக்கல் செய்யவே இல்லை என்று வருமான வரித்துறை கருதும். இதனால், தாமதமாக தாக்கல் செய்ததற்கான அபராதம் விதிக்கப்படலாம் அல்லது சில இழப்புகளை அடுத்த ஆண்டுகளுக்கு எடுத்துச் செல்லும் வாய்ப்பை இழக்க நேரிடலாம். எனவே, இ-வெரிஃபிகேஷன் முடிந்த பிறகு, அதற்கான ஒப்புதல் ரசீது (acknowledgment receipt) வந்துள்ளதா என்பதை உறுதி செய்வதே இறுதிக்கட்ட முக்கியப் பணியாகும்.