இந்திய சிறுதொழில்கள் அதிரடி வளர்ச்சி: 8% உயர்வு, 74 லட்சம் புதிய வேலைகள்!

முக்கியத் துறை வளர்ச்சி

இந்தியாவின் பதிவு செய்யப்படாத (Unincorporated), விவசாயம் அல்லாத துறையின் வளர்ச்சி 2025-ல் அசத்தலாக இருந்துள்ளது. இதன் நிறுவனங்களின் எண்ணிக்கை சுமார் 8% உயர்ந்துள்ளது. இது 2023-24 ஆய்வில் பதிவான 7.34 கோடி நிறுவனங்களிலிருந்து, தற்போது 7.92 கோடி அலகுகளாக அதிகரித்துள்ளது. சிறு உற்பத்தியாளர்கள், சேவை வழங்குநர்கள், வியாபாரிகள் போன்ற முறையான பதிவு செய்யப்படாத இந்த வணிகங்கள், நாட்டின் பொருளாதாரத்தில் முக்கிய பங்கு வகிக்கின்றன.

வேலைவாய்ப்பு அதிகரிப்பு

2025-ல் இந்தத் துறை சுமார் 12.81 கோடி தொழிலாளர்களை வேலைக்கு அமர்த்தியுள்ளது. இது முந்தைய ஆய்விலிருந்து 74.52 லட்சத்துக்கும் அதிகமான வேலைவாய்ப்புகளை சேர்த்துள்ளது. இதில், 'Other Services' துறை தான் முக்கிய பங்கு வகித்து, 7.4% வளர்ந்து சுமார் 35 லட்சம் புதிய வேலைகளை உருவாக்கியுள்ளது. உற்பத்தி (Manufacturing) சார்ந்த நிறுவனங்கள் சுமார் 6.5% மற்றும் வர்த்தக (Trade) நிறுவனங்கள் 6% மேல் உயர்ந்துள்ளன.

உற்பத்தித்திறன் மற்றும் சம்பள உயர்வு

தொழிலாளர்களுக்கான சம்பளம் 2025-ல் 3.88% உயர்ந்துள்ளது. குறிப்பாக, வர்த்தகத் துறையில் ஒரு தொழிலாளிக்கான சம்பளம் சுமார் 8.5% உயர்ந்துள்ளது. தொழிலாளர் உற்பத்தித்திறன் (Labor Productivity), அதாவது ஒரு தொழிலாளிக்கான மொத்த மதிப்பு கூட்டல் (GVA) ஆண்டுக்கு சுமார் ₹1.5 லட்சத்திலிருந்து ₹1.56 லட்சமாக உயர்ந்து, 4.54% வளர்ச்சி கண்டுள்ளது. மேலும், ஒரு நிறுவனத்திற்கான GVA-வும் சுமார் ₹2.46 லட்சத்திலிருந்து ₹2.53 லட்சமாக முன்னேறியுள்ளது.

பெண்கள் தொழில்முனைவில் வளர்ச்சி

சொந்தமாக தொழில் நடத்தும் பெண்களின் (Proprietary Establishments) எண்ணிக்கையில் சிறு முன்னேற்றம் காணப்பட்டுள்ளது. இது 26.2% லிருந்து 27% ஆக உயர்ந்துள்ளது. இந்தத் துறையில் பெண்களின் தொழில்முனைவு மெதுவாக அதிகரித்து வருவதைக் இது காட்டுகிறது. 6.7 லட்சத்துக்கும் மேற்பட்ட நிறுவனங்களிடமிருந்து பெறப்பட்ட தரவுகளின் அடிப்படையில் MoSPI நடத்திய இந்த ஆய்வு, சிறு வணிகங்கள் இந்தியப் பொருளாதாரத்தில் வகிக்கும் முக்கியப் பங்கை எடுத்துரைக்கிறது.