Semicon 2.0: புதிய கட்டுப்பாடுகளுடன் கெடுபிடி காட்டும் அரசு! இனி சொத்துக்களை அடமானம் வைக்க முடியாது

இந்தியாவின் செமிகண்டக்டர் துறையை விரிவுபடுத்தும் நோக்கில் கொண்டுவரப்பட்ட ₹1.27 லட்சம் கோடி மதிப்பிலான Semicon 2.0 திட்டத்தில், அரசு மிகவும் கடுமையான நிபந்தனைகளை விதித்துள்ளது. புதிய வழிகாட்டுதல்களின்படி, அரசு வழங்கும் சலுகைகளைப் பெறும் கம்பெனிகள், முழுமையான வணிக உற்பத்தியைத் தொடங்கும் வரை, தங்கள் ப்ராஜெக்ட் சொத்துக்களை விற்கவோ, அடமானம் வைக்கவோ அல்லது அதன் மீது எந்தவிதமான பிணையத்தை (Lien) உருவாக்கவோ அனுமதி இல்லை.

ஓனர்ஷிப் விதிகளில் கெடுபிடி

சொத்துக்கள் மீதான கட்டுப்பாடு மட்டுமின்றி, நிறுவனங்களின் கட்டமைப்பு குறித்த விதிகளும் இறுக்கப்பட்டுள்ளன. சலுகை ஒப்பந்தம் முடியும் வரையிலும், வணிக செயல்பாடுகள் தொடங்கிய பிறகு அடுத்த 3 ஆண்டுகளுக்கு, விண்ணப்பதாரர்கள் குறைந்தபட்சம் 51% பங்கு மூலதனத்தையும், அதற்கான வாக்குரிமையையும் வைத்திருக்க வேண்டும். இதில் ஏதேனும் மாற்றங்கள் செய்ய விரும்பினால், அரசு அமைப்பான 'நோடல் ஏஜென்சியின்' (Nodal Agency) முன் அனுமதியைப் பெறுவது கட்டாயமாகும். அரசு ஆதரவைப் பெற்ற பிறகு, அவசர அவசரமாக வெளிநாட்டுப் பங்காளிகளை உள்ளே இழுப்பதையோ அல்லது உரிமையாளர் அமைப்பை மாற்றுவதையோ தடுப்பதே இந்த விதியின் முக்கிய நோக்கம்.

எவற்றிற்கு மானியம் கிடையாது?

இந்த புதிய விதிமுறைகள், எவை முதலீடாகக் கருதப்படாது என்பதையும் தெளிவுபடுத்தியுள்ளன. நிலம் வாங்குதல், தொழில்நுட்ப பரிமாற்றம் மற்றும் ஆராய்ச்சி மற்றும் மேம்பாட்டு (R&D) செலவுகள் ஆகியவற்றுக்கு அரசு சலுகைகள் வழங்காது. அரசு தனது நிதி உதவியை முக்கிய இயந்திரங்கள் மற்றும் கட்டுமானப் பணிகளுக்கு மட்டுமே செலவிட விரும்புகிறது என்பதை இது காட்டுகிறது.

முதலீட்டாளர்களுக்கு இது என்ன உணர்த்துகிறது?

இந்தக் கட்டுப்பாடு, குறுகிய கால நிதி லாபத்தை நோக்கமாகக் கொண்ட நிறுவனங்களுக்குப் பெரிய தடையாக இருக்கும். குறிப்பாக, சொத்துக்களை அடமானம் வைத்து கடன் வாங்கும் நிறுவனங்களுக்கு நிதி நெருக்கடி ஏற்படலாம். சிப் டிசைன், ஃபேப் கட்டுமானம் மற்றும் ATMP/OSAT போன்ற துறைகளில் ஈடுபடும் நிறுவனங்கள், இனி மிக நீண்ட கால இலக்கோடுதான் முதலீடு செய்ய வேண்டும். இந்த மாற்றங்கள் ப்ராஜெக்டுகளின் நீண்டகால நிலைத்தன்மையை உறுதி செய்யும் என்று எதிர்பார்க்கப்படுகிறது.